Тээврийн хэрэгслээ бусдад шилжүүлэн өгсөн эзэмшигч учирсан гэм хорыг хариуцан арилгах үүрэгтэй

Иргэн А нь зуслангийн “Зунжин” дэлгүүрийн -ийн хойд замд шөнийн 00 цаг 30 минутын орчим иргэн Б-ийн өмчлөлийн “Porsche Panamera” маркийн тээврийн хэрэгслийг жолоодож явахдаа явган зорчигч Г-г мөргөж амь насыг нь хохироосон байна.

А нь тухайн өдөр байгууллагын дарга З-г зуслангийн гэрт нь хүргэж өгөхөөр З-н эцэг Б-ийн өмчлөлийн машиныг жолоодон явахдаа үзэгдэх орчин хязгаарлагдсан шөнийн цагт тээврийн хэрэгслийн хурдыг тохиромжтой байдлаар сонгон яваагүйгээс замын зорчих хэсэгт явган зорчигч гарч ирэх үед тээврийн хэрэгслийг зогсоож амжилгүй явган зорчигчийг мөргөж, амь насыг нь хохироосон нь тогтоогдов.

Чингэлтэй дүүргийн Эрүүгийн хэргийн анхан шатны шүүх А...-д тээврийн хэрэгсэл жолоодох эрхийг 3 жилийн хугацаагаар хасаж, 1 жилийн хугацаагаар хорих ялыг нээлттэй хорих байгууллагад эдлүүлэхээр шийдвэрлэсэн.

Хохирогчийн хууль ёсны төлөөлөгчөөс оршуулгын зардалд 19.843.274 төгрөг нэхэмжилснийг А нь бүрэн төлсөн. Харин хохирогчийн хууль ёсны төлөөлөгч нь шүүхийн хэлэлцүүлэгт шинээр нэмж хохирогчийн Банк бус санхүүгийн байгууллагаас авсан зээл, түүний хүү болох 11.069.082 төгрөг, бусад хохиролд 2.284.174 төгрөг, нийт 13.353.256 төгрөгийг нэхэмжилсэн.

Шүүх хохирогчийн Банк бус санхүүгийн байгууллагаас авсан зээл, түүний хүүг энэ гэмт хэргийн улмаас учирсан хохирол гэж үзэх боломжгүй тул Иргэний журмаар уг асуудлыг шийдвэрлүүлэх нь зүйтэй гэж дүгнэв.

А-ын унаж явсан тээврийн хэрэгсэл нь иргэн Б-ийн эзэмшлийнх тул Иргэний хуульд зааснаар тээврийн хэрэгслийг ашиглах явцад бусдын амь нас, эрүүл мэнд, эд хөрөнгөнд учирсан хохирлыг тухайн тээврийн хэрэгслийг эзэмшигч хариуцах, мөн тээврийн хэрэгслийг өмчлөгч, эзэмшигч тээврийн хэрэгслийг өөрөө бусдад шилжүүлэн өгсөн бол гэм хорыг хариуцан арилгах үүрэг хүлээх зохицуулалтын дагуу автомашины өмчлөгч Б-с амь хохирогч Г-ийн төрсөн охин У-ийн Солонгос улсаас Монгол улсад ирэх зардал болох 2.284.174 төгрөгийг гаргуулан хохирогчийн хууль ёсны төлөөлөгчид олгохоор шийдвэрлэсэн байна.

Энэ хураангуй нь шүүхийн шийдвэр биш бөгөөд түүнийг орлохгүй. Зөвхөн олон нийтэд ойлгомжтой байдлаар мэдээлэн хүргэх зорилготой болно.

Боловсруулсан: Чингэлтэй дүүргийн Эрүүгийн хэргийн анхан шатны шүүхийн Ерөнхий шүүгч Б.Халиун