БНХАУ Номхон далайн орнуудтай бүс нутгийн эдийн засгийн аюулгүй байдлын өргөн хүрээтэй гэрээ хэлэлцээ хийж, эдгээр улс дахь нөлөөгөө эрс өргөжүүлэхээр зорьж байна.

Номхон далайн орнуудтай илүү ойр дотно харилцаатай болох алсын хараагаа онцолсон Хятад улс тус бүс нутгийн цагдаа нарыг сургаж, кибер аюулгүй байдал, далайн нарийн зураглал хийх ажилд оролцон, байгалийн баялгийг илүү хүртээмжтэй болгохыг санал болгосон байна. Уг хэлэлцээрийн төсөлд худалдаа, санхүү, хөрөнгө оруулалт, аялал жуулчлал, нийгмийн эрүүл мэнд, гамшгаас урьдчилан сэргийлэх, Ковид-19-ийн эсрэг дэмжлэг зэрэг асуудлаас гадна хятад хэл, соёлын солилцоо, сургалт, тэтгэлгийн арга хэмжээг тусгасан аж.

Хятадын Гадаад хэргийн сайд Ван И ирэх 10 хоногийн дотор Номхон далайн найман улсад айлчлах бөгөөд эдгээр орны удирдагчидтай энэхүү гэрээний талаар хэлэлцэх юм. Улмаар ноён Ван И ирэх долоо хоногт Фижи улсад Хятад-Номхон далайн бүсийн Гадаад хэргийн сайд нарын хоёр дахь уулзалтыг зохион байгуулах бөгөөд энэ үеэр 10 орон тус гэрээнд гарын үсэг зурна гэж Хятадын эрх баригчид найдаж байна.

Гэвч уг төлөвлөгөө нь Барууны болон Номхон далайн орнуудын зарим удирдагчийг санаа зовниход хүргээд байгаа юм. Тухайлбал, Микронезийн Холбооны Улсын Ерөнхийлөгч Дэвид Пануэло Номхон далайн 21 удирдагчид хаягласан захидалдаа, энэхүү гэрээ хэлэлцээрийн улмаас Хятад болон Барууны орнуудын хооронд шинэ "Хүйтэн дайн" дэгдэж магадгүй гэж эмээж буйгаа тэмдэглэжээ.

Эх сурвалж: The Guardian

---