Швед, Финландын төлөөлөгчид Туркийн талтай хэлэлцээ хийнэ

Швед, Финландын төлөөлөгчид Туркийн Анкара хотноо хүрэлцэн ирсэн бөгөөд тус улсын өндөр албан тушаалтнуудтай яриа хэлэлцээ хийж, НАТО-д элсэх хүсэлтийг нь дэмжихийг ятгахаар төлөвлөж байна.

Скандинавын хоёр улс нь НАТО-д элсэх хүсэлтээ өнгөрсөн долоо хоногт албан ёсоор хүлээлгэн өгсөн нь Оросын цэргийн хүчин Украинд түрэмгийлснээс үүдэлтэй геополитикийн хамгийн том үр дагавруудын нэг болсон билээ. Үүсээд буй нөхцөл байдлын улмаас Швед, Финланд улсууд НАТО-д түргэн шуурхай элсэхийг найдаж байсан ч Турк улсын Засгийн газар энэхүү алхмыг эсэргүүцэж байгаа юм. НАТО-д шинээр гишүүн элсүүлэхийн тулд тус цэргийн эвслийн 30 гишүүн орон бүгд зөвшөөрөх ёстой.

Турк улсын зүгээс Швед, Финландыг Курдистаны Ажилчны нам болон Туркийн аюулгүй байдалд заналхийлсэн бусад байгууллагад дэмжлэг үзүүлдэг хэмээн буруушаасан. Мөн эдгээр хоёр орныг Туркийн зэвсгийн экспортод хязгаарлалт тавьж, сэжигтэй "террористуудыг" шилжүүлэн өгөхөөс татгалзсан гэж шүүмжилжээ.

Тэгвэл энэхүү байр суурийг өөрчлөх зорилготой төлөөлөгчдийн багийг Шведийн Төрийн нарийн бичгийн дарга Оскар Стенстрем болон Финландын Гадаад хэргийн яамны нарийн бичгийн дэд дарга Жукка Саловаара нар тэргүүлж байна. Тэд Туркийн Ерөнхийлөгч Режеп Тайип Эрдоганы хэвлэлийн төлөөлөгч Ибрахим Калин ба Гадаад хэргийн дэд сайд Седат Онал нартай хэлэлцээ хийх юм. 

Эх сурвалж: AP