Луганск мужийн сургууль бөмбөгдөлтөд өртөж, 60 хүн амь үрэгджээ

Украины зүүн хэсгийн Луганск мужийн Белогоровка дахь сургуулийн барилга Оросын цэргийн хүчний бөмбөгдөлтөд өртсөний улмаас 60 орчим хүн амиа алдсан гэж Ерөнхийлөгч Владимир Зеленский мэдээлжээ.

Мужийн амбан захирагч Сергей Гайдайн хэлснээр, тус барилгад нийт 90 иргэн хоргодож байсан бөгөөд Оросын цэргүүдийн халдлагаас өмнө 30 хүнийг гаргаж аваад байжээ. Бөмбөгдөлтөөс үүдэлтэй дэлбэрэлтийн улмаас тус барилга нурж, галд авсан бөгөөд гал сөнөөгчид галыг унтраахад гурван цаг зарцуулсан байна. Тус сургуулийн хонгилд тосгоны бараг бүх оршин суугч хоргодож байсан ба нурангийг бүрэн цэвэрлэсний дараа амиа алдагсдын албан ёсны тоог гаргах боломжтой гэж орон нутгийн албаныхан тэмдэглэсэн юм.

НҮБ-ын Ерөнхий нарийн бичгийн дарга Антонио Гутерриш энэхүү халдлагад "цочирдсон" гэдгээ онцлоод, "Дайны үед энгийн иргэдийг үргэлж амьд үлдээх ёстой" хэмээн мэдэгджээ.

Оросын цэргийн хүчин болон салан тусгаарлагчдын дайчид Украины цэргүүдийг бүслэхийг оролдож байгаагийн улмаас Луганск хотод ширүүн тулаан өрнөж байна. Уг бүс нутгийн ихэнх хэсэг нь сүүлийн найман жилийн турш Оросын дэмжлэгтэй салан тусгаарлагчдын хяналтад байсан юм.

Ерөнхийлөгч Зеленский өнгөрөгч ням гарагт АНУ-ын Ерөнхийлөгч Жо Байден, Их Британийн Ерөнхий сайд Борис Жонсон зэрэг "Их долоо" бүлгийн удирдагчидтай цахим уулзалт хийсэн бөгөөд энэ үеэр Барууны удирдагчид Украинд үргэлжлүүлэн дэмжлэг үзүүлж, Оросын газрын тосны нийлүүлэлтээс татгалзахаа амласан байна.

Эх сурвалж: BBC