?LIVE: Биокомбинатын залуус цэвэр уст Харз гол, Хатан Туулын өмхий уснаас хамгаалж, далан барьж байна

Үйлдвэрүүд Туул гол руу бохироо цутгаснаас үүдэн уг гол бохирдоод олон жил болж байна. Гол үерлэхээр бохир, өмхий ус нь Биокомбинатад үлдсэн цор ганц цэвэр устай Харз гол руу цутгадаг байна. Иймд Харз голоо хамгаалахаар нутгийн оршин суугчид өөрсдийн хөрөнгө, техникээр 400м урттай, 5м өргөнтэй далан барьж эхэлжээ.

Харз гол

Харз гол нь Туул голоос 200 метрийн зайтай байдаг ч гол үерлэх үед голын бохир ус Харз гол руу цутгаж бохирдуулдаг байна. Иймд Хан-Уул дүүргийн 12 дугаар хороо буюу Биокомбинатадын уугуул оршин суугч залуус нэгдэж, хандив цуглуулан, Харз голынхаа ундаргыг хамгаалахаар далан барьж байна.

Биокомбинатын залуус:

-Сүүлийн 20 жилийн хугацаанд Туул голын ус бохирдсоор ирсэн. Ялангуяа арьс ширний үйлдвэрүүд хаягдал усаа цутгадгаас болж, өвөл нь хөлдөхгүй жилийн дөрвөн улирал өмхий үнэртэй ус урсдаг.

Зуны цагт бороо хур элбэг үед гол үерлэж, эндхийн ганц цэвэр устай гол болох Харз үерт автаж, бохирддог тул нутгийн хэсэг залуус нэгдэн өөрсдийн хөрөнгөөр далан босгох ажлыг санаачлан хэрэгжүүлж байна.

Уг ажил дөрөв дэх өдрөө үргэлжилж байгаа бөгөөд нутгийн иргэд талархалтай хүлээн авч, өөрсдийн чадах бүхнээрээ тусалж байгаад баяртай байна. Төр засаг Туул голын бохирдолтой тэмцэнэ гэдэг ч хэдий болтол хүлээх билээ. Ядаж ганц байгаа цэвэр голынхоо ундаргыг хамгаалах нь зүйтэй юм уу гэдэг санаачилга гарган ажиллаж байна. Цаашид төр засгаас Туул голын бохирдолтой тэмцэнэ нь гэдэгт итгэлтэй байна гэв.