АНУ Украиныг "шаардлагатай зэвсгээр" нь хангана

АНУ Украиныг "шаардлагатай зэвсгээр" нь хангасаар байх болно гэж тус улсын Үндэсний аюулгүй байдлын зөвлөх Жейк Салливан мэдэгджээ.

Түүний хэлснээр, Ерөнхийлөгч Жо Байдены засаг захиргаа ОХУ-ыг илүү их газар нутгийг булаан авч, энгийн иргэдийг онилохоос сэргийлэхийн тулд Украин руу илүү их зэвсэг илгээхээр төлөвлөж байгаа аж. ОХУ өнгөрсөн 2 дугаар сарын 24-нд цэргийн үйл ажиллагаагаа эхэлснээс хойш АНУ Украинд 1.7 тэрбум ам.долларын цэргийн тусламж илгээгээд байгаа юм.

Жейк Салливан өнгөрөгч ням гаргийн мэдэгдэлдээ "Оросууд илүү олон хот, сууринг эзэлж, дайны гэмт хэрэг үйлдэхийг зогсоохын тулд бид Украиныг шаардлагатай зэвсгээр нь хангах болно. Манай улс эдгээр зэвсгийг хүргэхийн тулд цаг наргүй ажиллаж байгаа бөгөөд бусад улс орноос зэвсэг нийлүүлэх ажлыг ч зохион байгуулж, зохицуулж байна. Бидний зэвсгийн хүргэлт өдөр бүр ирж байгаа ба өнөөдөр ч очсон" хэмээн тэмдэглэсэн байна.

Одоог хүртэлх зэвсгийн тээвэрлэлтэд агаарын довтолгооноос хамгаалах систем, танк эсэргүүцэгч пуужингууд болон сум, хуяг дуулга зэрэг багтаж байсан билээ. Харин Украины Ерөнхийлөгч Владимир Зеленский тус улсын зүүн бүс нутаг дахь Оросын цэргийн хүчинтэй байлдахын тулд АНУ болон Европын удирдагчдаас илүү хүнд зэвсэг, техникийг хүсэж байгаа юм.

Гэвч АНУ Украинд үнэхээр "шаардлагатай" зэвсэг нийлүүлнэ гэдэгт эргэлзэж буйгаа илэрхийлсэн Зеленский "Украин Оросын түрэмгийллийг даван туулж чадах эсэх нь АНУ бидэнд хэр хурдан туслахаас хамаарна. Үнэнийг хэлэхэд бид амьд үлдэх эсэх нь үүнээс л хамаарна" гэжээ.

Эх сурвалж: Reuters