БИЧЛЭГ: ОХУ-ыг НҮБ-ын Хүний эрхийн зөвлөлөөс түдгэлзүүлжээ
ОХУ Украинд "хүний эрхийг бүдүүлгээр, зохион байгуулалттайгаар зөрчсөн" гэх мэдээллийн улмаас НҮБ-ын Ерөнхий Ассамблей тус улсын Хүний эрхийн зөвлөлийн гишүүнчлэлийг түдгэлзүүлжээ. Тэгвэл үүний дараахан Оросын төлөөлөгчид тус зөвлөлөөс гарч байгаагаа зарласан юм.
АНУ тэргүүтэй уриалгыг 93 орон дэмжсэн бол 24 орон татгалзаж, харин 58 орон санал өгөхөөс түдгэлзсэн байна. 47 гишүүнтэй Хүний эрхийн зөвлөлөөс Орос улсыг түр хасахын тулд 193 гишүүнтэй Ерөнхий ассамблейн гишүүдийн гуравны хоёр буюу олонх нь дэмжих шаардлагатай бөгөөд үүнд санал өгөхөөс түдгэлзсэн улсуудыг тооцохгүй аж.
Санал хураалтын дараа НҮБ дахь ОХУ-ын байнгын төлөөлөгчийн орлогч Геннадий Кузьмин үг хэлэхдээ, энэхүү үйлдлийг "хууль бус бөгөөд улс төрийн зорилготой алхам" гэж тодорхойлоод, улмаар Орос улс Хүний эрхийн зөвлөлөөс гарахаар шийдсэнээ мэдэгджээ.
Харин НҮБ-д суугаа Украины байнгын төлөөлөгч Сергей Кислица энэ талаар "Ажлаасаа халагдсан хүн огцрох өргөдлөө өгөх боломжгүй" хэмээн сэтгүүлчдэд хэлсэн юм.
НҮБ-ын Хүний эрхийн зөвлөл дэх орнууд гурван жилийн хугацаатай гишүүнчлэлийг гүйцэтгэдэг ч ОХУ ийнхүү хоёр жилийн дараа гарч байгаа аж. Өнгөрөгч пүрэв гаргийн тогтоолын дараа Ерөнхий Ассамблей шийдвэрээ буцаах магадлалтай байсан ч Оросын мэдэгдлийн улмаас боломжгүй болжээ.
Өмнөх хоёр санал хураалтад түдгэлзсэн хариу өгөөд байсан Хятад улс энэ удаад эсэргүүцсэн санал өгсөн байна. НҮБ дахь БНХАУ-ын байнгын төлөөлөгч Жан Жүн мэдэгдлийнхээ үеэр "Ерөнхий Ассамблейн гишүүн улс орнуудыг өөр өөр тал сонгоход хүргэж буй ийм яаруу алхам нь гишүүдийн хооронд хагарал, маргааныг хурцатгаж, холбогдох талуудын сөргөлдөөнийг улам доройтуулна. Энэ бол гал дээр тос нэмсэнтэй адил явдал" хэмээн буруушаажээ.
.png)
Эх сурвалж: Reuters
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.