Сүхбаатарын талбайд иргэд үнийн өсөлтийг эсэргүүцэж, "Монголдоо сайхан амьдаръя" уриан дор тайван жагсаал зохион байгуулж байна. 

Жагсаалд оролцож буй иргэдийн дийлэнх нь залуучууд байгаа бөгөөд харийн нутагт бус эх орондоо таатай нөхцөлд амьдрахыг хүсэж буйгаа илэрхийлж байгаа юм. 

Сүхбаатарын талбайд жагссан иргэд ийнхүү нэгдэн долоон шаардлагыг бичжээ. Тус шаардлагыг ХЗДХ-ийн сайд Х.Нямбаатар Төрийн ордоноос гарч ирж авлаа. Иргэдийн зүгээс өгсөн тус шаардлагыг Ерөнхий сайд Л.Оюун-Эрдэнэд танилцуулна гэдгээ илэрхийллээ.

ХЗДХ-ийн сайд Х.Нямбаатар:

-Төрийн ордоны баруун талын хаалган дээр залуучууд та бүхнийг төлөөлөөд долоон төрлийн шаардлагыг Засгийн газарт тавьсан байна.

1.    Үнийн өсөлтөд Засгийн газар арга хэмжээ авах

2.    Цалин нэмэх 

3.    Татварын дарамтаа хэмжээ, хязгаартай нэмэх

4.    Цар тахал болон зөрчлийн хуулиа өөрчлөх

5.    Цэцэрлэгийн хүүхдүүдийг сугалаагаар оруулдаг явдлыг эсэргүүцсэн байна

6.    УИХ-ын гишүүн, иргэд хоорондоо хуулийн хувьд эрх тэгш байх

7.    Эрүүгийн хуулийн 22.1-ийн Авлига, албан тушаалын хэрэгт оногдуулж байгаа ял, шийтгэлийн бодлогоо өөрчлөх зэрэг шаардлагыг тавьсан байна. Эдгээр шаардлагыг Хэвлэл мэдээллийн байгууллага, цахим орчноор дамжуулан шаардлагынхаа хариуг нэн даруй өгөхгүй, зоригтой шийдвэр гаргахгүй бол залуус нэгдсээр байх болно гэжээ.

Энэ тавьсан долоон асуудлыг Засгийн газрын зүгээс яаралтай байр сууриа илэрхийлэхийг залуус шаардлаа. Иймд уг шаардлагыг Ерөнхий сайдад танилцуулж, маргааш хэвлэл мэдээллийн байгууллагаар дамжуулан ямар арга хэмжээ авч байгаагаа мэдээлнэ гэв.

---