ЕХ-ны дөрвөн орон ОХУ-ын 40 гаруй дипломатчийг хөөжээ

Ирланд, Бельги, Нидерланд, Чех улсууд ОХУ-ын 43 дипломатын төлөөлөгчийг тагнуул хийсэн хэрэгт сэжиглэн, тэднийг улсаасаа хөөх хамтарсан шийдвэр гаргажээ.

Бельгийн Гадаад хэргийн сайд Софи Вилмесийн хэлснээр, Брюссель дэх ОХУ-ын Элчин сайдын яам болон Антверпен дэх Консулын газрын 21 ажилтныг тус улсаас албадан гаргах бөгөөд тэдэнд хоёр долоо хоногийн хугацаа өгсөн аж. Энэхүү шийдвэр нь "Манай үндэсний аюулгүй байдалтай холбоотой" гэж тэрээр Парламентын гишүүдэд хандаж үг хэлэх үеэрээ онцолсон байна. 

Нидерланд улс мөн уг арга хэмжээнд нэгдсэн бөгөөд "тагнуулын нууц ажил" гүйцэтгэж байсан 17 дипломатчийг хөөх болсноо Гадаад хэргийн яам нь мэдэгдсэн юм. Харин Чехийн Прага хотоос хөөгдсөн төлөөлөгч нь Оросын Элчин сайдын орлогч байсан бөгөөд тус улсын Гадаад хэргийн яам "Бид холбоотнуудтайгаа хамтран ЕХ дахь ОХУ-ын тагнуулын оролцоог багасгаж байна" хэмээн мэдэгджээ.

Түүнчлэн Ирландын Засгийн газар тагнуулын ажилтнуудаасаа аюулгүй байдлын зөвлөгөө авсны үр дүнд Оросын дөрвөн дипломатчийг хөөсөн болохыг Ерөнхий сайд Майкл Мартин зарласан байна. Гэвч Дублин дэх ОХУ-ын Элчин сайдын яам энэхүү "үндэслэлгүй шийдвэр"-ийг буруушааж, энэ нь "Орос-Ирландын харилцааг улам дордуулна" гэж тэмдэглэсэн юм.

ЕХ-ны хэд хэдэн гишүүн орон өнгөрсөн долоо хоногт үүнтэй ижил төстэй арга хэмжээ авсан бөгөөд Польш улс Оросын 45 итгэмжлэгдсэн дипломатчийг албадан гаргасан билээ. Мөн Болгар, Литва, Латви, Эстони улсууд энэ сарын эхээр ОХУ-ын Элчин сайдын яамны нийт 20 ажилтныг "дипломат статустай нь харшлах" үйл ажиллагаа явуулсан хэргээр хөөгөөд байсан бол Оросын зүгээс өнөөдөр хариу арга хэмжээ авч, Эстони, Латви, Литвийн 10 дипломатчийг улсаасаа албадан гаргахаа мэдэгджээ.

Эх сурвалж: BBC