Мариуполийн олон мянган иргэнийг ОХУ руу нүүлгэн шилжүүлжээ

Украины Мариуполь хотын олон мянган энгийн иргэнийг Оросын цэргүүд албадан нүүлгэн шилжүүлсэн гэж хотын эрх баригчид мэдэгджээ.

Оросын цэргийн хүчин Мариуполийн зүүн хэсэгт орших Безименн дэх түр хуаранд ойролцоогоор таван мянган иргэнийг байрлуулж байгаа нь хиймэл дагуулын зургаар тогтоогдсон байна. Одоо ОХУ-д байгаа нэгэн украйн иргэн "Биднийг хүчээр авч явсан" гэж "BBC" агентлагт ярьжээ.

Украины Шадар сайд Ирина Верещукийн мэдээлснээр, Оросын тал Киевтэй ямар ч тохиролцоонд хүрээгүй хэр нь 40 мянган украйн хүнийг ОХУ болон тус улсын мэдлийн нутаг дэвсгэрт шилжүүлсэн аж. Өөрөөр хэлбэл, ОХУ иргэдийг "шүүлтийн лагерьт" албадан шилжүүлж байгаа гэж Украины албаныхан буруушаажээ.

Дайтагч тал орон нутгийн иргэдийг өөрийн нутаг дэвсгэр рүү албадан шилжүүлэх нь олон улсын хуулийн дагуу хүний ​​эрхийг зөрчсөн үйлдэл юм.

Оросын цэргүүдэд бүслэгдсэн Мариуполиос 140 мянган иргэн дүрвээд байгаа бол 170 мянга орчим хүн тус хотод гацсан хэвээр байна. Сүүлийн гурван долоо хоног гаруйн турш тасралтгүй үргэлжилсэн халдлагуудын улмаас хот балгас болж, айж эмээсэн энгийн иргэд зооринд нуугдаж, ус, хоол хүнс, эм тарианы хомстолд ороод байгаа билээ.

Тэгвэл өлсөж, цанган, өвчинд нэрвэгдсэн оршин суугчид Оросын хяналтад байдаг бүс нутаг болон ОХУ руу явахаас өөр сонголтгүй болсон гэж эх сурвалжууд мэдээлсэн юм. Харин Оросын эрх баригчид олон мянган украйн иргэнийг эх орноос нь албадан гаргасан гэх мэдээллийг үгүйсгэсэн байна.

Эх сурвалж: BBC