Мариуполь хотын эрх баригчид бууж өгөхөөс татгалзжээ

ОХУ-ын цэргийн хүчин Украины Мариуполь хотыг сүүлийн хэдэн долоо хоногийн турш бүслээд байгаа бөгөөд хэрэв хотын эрх баригчид бууж өгвөл иргэдэд аюулгүй гарц олгох санал тавьсан ч Украины тал татгалзжээ.

Оросын генерал Михаил Мизинцев тус хотод хүмүүнлэгийн аймшигт гамшиг нүүрлээд байгааг хүлээн зөвшөөрч, уг саналыг танилцуулсан байна. Үүний дагуу, Мариуполь дахь украйн болоод "гадаадын хөлсний" цэргүүд зэвсгээ хаяж, хотыг орхин гарах ёстой бөгөөд үүний дараа хоол хүнс, эм тариа болон бусад хангамж бүхий хүмүүнлэгийн цувааг хот руу оруулахыг зөвшөөрч, энгийн иргэдийг аюулгүй гарцаар хангах байсан юм.

Мариуполийн эрх баригчид энэхүү нөхцөлийг өнөөдөр өглөө хүртэл хүлээж авах шаардлагатай байсан ч бүс нутгийн албаныхан яасан ч бууж өгөхгүй гэж мэдэгджээ. Украины Ерөнхий сайдын орлогч Ирина Верещук энэ талаар "Украин Мариуполь хотыг хамгаалахаа зогсоохгүй. Яасан ч бууж өгч, зэвсгээ хаяхгүй" хэмээн онцолсон байна.

Харин Мариуполь хотын даргын зөвлөх Петр Андрющенко "Бид эцсийн хүчээ барагдтал тулалдах болно" гэж мэдэгдсэн юм. Түүний хэлснээр, Москвагийн хүмүүнлэгийн амлалтад итгэх боломжгүй бөгөөд Оросын арми зарим оршин суугчийг ОХУ руу албадан нүүлгэн шилжүүлж байгаа аж.

Мариуполь бол Оросын стратегийн гол бай бөгөөд хамгийн ширүүн тулаан өрнөж буй хотуудын нэг юм. Тус хотод ойролцоогоор 300 мянган хүн хэдэн долоо хоногийн турш ундны ус, цахилгаан, хийгүй гацаад байгаа билээ. Мөн хоол хүнс, эмнэлгийн хэрэгсэл дуусаж байгаа ч Оросын цэргүүд хүмүүнлэгийн тусламжийг оруулахыг хоригложээ.

ОХУ-ын түрэмгийлэл эхэлснээс хойш тус хотын барилгуудын 90 хувь нь эвдэрч, сүйдсэн бөгөөд багадаа 2,500 иргэн амь үрэгдсэн гэж албаныхан үзэж байгаа ч бодит тоо нь илүү их байж магадгүй байна.

Эх сурвалж: BBC