Орчин цагийн Зэвсэгт хүчин үүсэн байгуулагдсаны 101 жилийн ой, Монгол цэргийн өдөр өнөөдөр тохиож байна. Энэхүү баярт өдрийг тохиолдуулан Монгол улсын Гавьяат хуульч, доктор, профессор, Монгол улсын анхны эмэгтэй хурандаа Р.Оюунбадамтай ярилцлаа.

Монгол улс 1936 оноос хурандаа болон генерал цолыг олгож эхэлсэн. Эр цэргийн алба хаагчдад хурандаа цол олгосны 50 жилийн дараа буюу одоогоос 28 жилийн өмнө анх удаа эмэгтэй цэргийн алба хаагч хурандаа цол хүртсэн нь Монгол улсын Гавьяат хуульч, доктор, профессор, Р.Оюунбадам гуай байсан юм.

Анхны генерал цолтон төрсөн түүхэн энэ өдөр анхны эмэгтэй хурандаатай ярилцсанаа та бүхэнд хүргэе.

Тэрээр "1936 оны хоёрдугаар сарын 24-ний өдөр Улсын бага хурлын тэргүүлэгчид, ардын сайд нарын зөвлөлийн хамтарсан тушаалаар цэргийн цол бий болгосон байдаг. Улмаар 1936 оноос хурандаа болон генерал цолыг олгож эхэлсэн. Эр цэргийн алба хаагчдад хурандаа цол олгосны 50 жилийн дараа буюу одоогоос 28 жилийн өмнө анх удаа эмэгтэй цэргийн алба хаагчид хурандаа цол олгохоор шийдвэрлэснээр миний бие хүртээж байсан юм.

Гэтэл өнөөдөр Монгол улсад генерал цол хүртээсний 86 жилийн дараа эмэгтэй хүн анх удаагаа генерал цол хүртсэн асар тэмдэглэлтэй сайхан өдөр болж өнгөрлөө. Өнөөдөр Монголын анхны эмэгтэй генерал цолтон төрснийг хараад хурандаа цолоо хүртэж байснаа дурсаж, догдоллоо" хэмээн ярьсан юм.

---