Н.Түвшинбаярыг дахиад нэг зүйл ангид зааснаар яллагдагчаар татжээ

Хөдөлмөрийн баатар, олоимпын аварга Н.Түвшинбаярыг цагдан хорих хугацаа өчигдөр дуусаж буйтай холбоотойгоор Хан-Уул дүүргийн Прокурорын газраас үргэлжлүүлэн хорих санал өнгөрсөн баасан гарагт шүүхэд гаргасан юм.

Уг саналыг тус дүүргийн Эрүүгийн хэргийн анхан шатны шүүх прокурор, яллагдагчийн болон хохирогчийн өмгөөлөгч нарыг оролцуулан хэлэлцээд Эрүүгийн хэрэг хянан шийдвэрлэх тухай хуулийн 14.9-2 дахь хэсэгт заасан “Эрүүгийн хуулийн тусгай ангид хорих ялын доод хэмжээг найман жил, түүнээс дээш хугацаагаар оногдуулахаар заасан гэмт хэргийн яллагдагчийн хувийн байдал, үйлдэгдсэн гэмт хэргийн шинжийг харгалзан Эрүүгийн хэрэг хянан шийдвэрлэх ажиллагааны зорилтод нийцүүлэн цагдан хорих таслан сэргийлэх арга хэмжээ авч болно”, 14.10-2 дахь хэсгийн “Хэргийн ээдрээ төвөгтэй байдлыг харгалзан яллагдагчийг цаашид цагдан хорьж болно” гэсэн заалтыг үндэслэн цагдан хорих хугацааг дахин нэг сар сунгасныг Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхийн Тамгын газраас мэдээлэв.
Н.Түвшинбаярыг Эрүүгийн хуулийн 10.1-2.1-т заасан “Хүнийг онц харгис хэрцгийгээр хөнөөсөн” хэмээн зүйл ангийг нь өөрчлөөд буй талаар бид өмнө нь мэдээлсэн.

Тэгвэл нэмэлт мөрдөн шалгах ажиллагааны явцад Хан-Уул дүүргийн Прокурорын газраас Эрүүгийн хуулийн 17.8-1 дэх хэсэгт заасан “Бусдын эд хөрөнгийг устгасан, гэмтээсэн” гэж нэмж ял сонсгосон байна.

Н.Түвшинбаяр 2021 оны дөрөвдүгээр сарын 2-ны үдэш улсын начин Э.Энхбатыг зодож, аминд нь хүрэх гэмтэл учруулсны сацуу Булган аймгийн ИТХ-ын төлөөлөгч С.Гал-Эрдэнийн эзэмшлийн “MGT mining LLC” компанийн албан өрөөнд эд хогшлыг нь эвдэж, сүйтгэсэн нь мөрдөн шалгах ажиллагаагаар тогтоогдсон тул ийнхүү нэмж яллагдагчаар татсан гэнэ. Эх сурвалжуудын мэдээлж буйгаар энэ долоо хоногт багтааж Н.Түвшинбаярт холбогдох хэргийг шүүхээр дэнслүүлэхээр шилжүүлэхээр бэлтгэж буй аж.