АН-ын даргын сунгаанд нэр дэвшигч 500 сая төгрөгийн дэнчин байршуулах ёстой. Ерөнхийлөгч асан Х.Баттулга дэнчингээ байршуулснаа өчигдөр зарласан. Харин өнөөдөр УИХ-ын гишүүн Ж.Батсуурь дэнчингийн мөнгөө байршуулснаа мэдэгдлээ.

УИХ-ын гишүүн Ж.Батсуурь:

-Ардчилсан намын дотоод сонгуулийн хороо даргын сунгааг хоёрдугаар сарын 22-ны өдөр зарласан. Дөрөвдүгээр сарын 3-ны өдөр дүнгээ гаргах ёстой. Энэ сунгаанд Ардчилсан намын ямар ч гишүүн нэрээ дэвшүүлэх боломжтой. Ардчилсан нам парламентад суудалтай нам учраас парламентын гишүүн энэ намыг даргалах ёстой гэсэн бодолтой байдаг. УИХ-ын гишүүн О.Цогтгэрэл нэрээ татсан. Би нэрээ хамгийн эхэнд дэвшүүлсэн. Олон сайхан залуус нэрээ бүртгүүлэх байх гэсэн бодолтой байсан ч хамгийн сүүлд Ерөнхийлөгч асан Х.Баттулга нэрээ дэвшүүлсэн байна лээ. Ингээд хоёр хүн нэр дэвшиж байна.

Ардчилсан нам асар том нам. Тийм учраас татвар, дэнчин бүх зүйл итгэл үнэмшил дээр явдаг. Дэнчин болох 500 сая төгрөгөө хугацаанд нь төлчихсөн. Дэнчингийн мөнгө нь дотоод сонгууль явуулах үйл ажиллагаанд зориулагддаг. Өрсөлдөгчийн тухайд дотоод сонгуулийн хорооноос сурталчилгаа эхэлтэл ямар нэг байдлаар давуу эрх олгохыг хориглосон байгаа. Иймд нөгөө нэр дэвшигчийн талаар ярих боломжгүй байна гэлээ.

---