Олон нийтийн газар Зөрчлийн хууль болон ёс зүйн зөрчил гаргасан МУИС-ийн Хууль зүйн сургуулийн 5-р курсийн оюутан Б.Ариунзаяаг хөөх шийдвэрийг тус сургуулийн удирдлагууд гаргасан талаар танилцуулж байна. 

МУИС-ийн Хууль Зүйн сургуулийн захирал Б.Амарсанаа:

-Хуульчийн хувьд ул суурьтай хандах хэрэгтэй. Хэт нийгмийн давлагаанд хөтлөгдөж болохгүй гэх зарчим байдаг. Бид анхааралтай ажигласан бөгөөд байнга анхаарал тавьж ирсэн. Тиймээс ул суурьтай асуудлыг авч хэлэлцлээ. Хууль зүйн сургуулиас тухайн оюутныг МУИС-иас хасах тухай саналыг хүргүүлж байгаа. Энэхүү саналыг оюутантай байгуулсан гэрээг үндэслэн гаргалаа. Хүмүүнлэг ёсны харилцааны наад захын хэм хэмжээг бүдүүлгээр ноцтой зөрчсөн гэж үзэж байгаа учраас тухайн оюутныг МУИС-ийн оюутны эгнээнээс хасах саналыг хүргүүлж байна.Бид тухайн оюутнаас болсон хэргийн талаар тодруулах гэсэн боловч хүрэлцэн ирсэнгүй. Мөн бид зөвхөн энэ тохиолдлоор хязгаарлагдахгүйгээр хуульчийн мэргэжлийн удиртгал хичээлийг сэргээн оруулах талаар ярилцсан. Мөн цаашид оюутнуудаа сонгон шалгаруулж элсүүлэхдээ ямар зүйлийг нэмж хийх ёстой вэ анхаарах ёстой талаар ярилцлаа. Манай сургуулийн оюутнууд шилдэг оюутнууд байгаа. Энэ олон хүн дотроос ёс суртахууны доголдол гарахыг үгүйсгэхгүй. Гэхдээ энэ байдал дээр системтэй арга хэмжээг авна.  

Хууль зүйн шинжлэх ухааны доктор, профессор, академич С.Нарангэрэл:

-Манай сургуулийн захиргааны зөвлөл олон цаг гаргаж хуралдлаа. Багш нарын хувьд дэндүү хатуу шийдвэр болж тусаж байгаа юм. Үндэслэл нь, оюутан суралцагч сургуулийн дотоод дүрэм журмыг биелүүлнэ, дотоод журмыг хүндэтгэн сахина гэж хуулийн заалт бий. Харин манай МУИС-ийн дотоод журамд хүнлэг байх агуулга бий. Энэ заалт зөрчигдсөн. Хүмүүний ёс зүй, эелдэг харилцааны наад захын хэм хэмжээг бүдүүлгээр зөрчсөн.Ийм хүнд бид эрх зүйчийн дипломыг нь өгөх итгэл найдвар алдагдлаа. Тийм учир ийм шийдвэр гаргахаас өөр арга алга. 

Ямартай ч МУИС-ийн Хууль зүйн сургуулийн захиргаа шийдвэрээ гаргалаа. Шийдвэрийг МУИС-ийн Удирдах зөвлөлд хүргүүлнэ. МУИС-ийн ерөнхий зөвлөл оюутан Б.Арианзаяаг хөөх асуудлыг эцэслэн шийднэ. 

---