Төсвийн хөрөнгөөр нийслэлд хийх авто замын ажлуудын талаар мэдээлэл өглөө. Нийт дөрвөн том, 22 жижиг ажил төлөвлөсөн байна.

Нийслэлд дөрвөн гол гудамж, замыг бий болгохоор төлөвлөсөн байна.

Нэгдүгээрт: Ард Аюушийн өргөн чөлөөг Гэмтлийн эмнэлгээс Содон хорооллын уулзвартай холбоно. Үндсэн гол гудамж, замтай болсноор нийтийн тээврийг зорчуулах боломж бүрдэх тул түгжрэл буурах нэг алхам юм.

Хоёрдугаарт: Улиастайн тойргоос эхлээд Шар хадны эцсийн буудал хүртэл гол гудамж, замтай болно. Уг зам бий болсноор хотын төвөөс орж ирж байгаа иргэд гол гудамжаар холбогдоно.

Гуравдугаарт: Зайсангийн гүүрийг дөрвөн эгнээ болгож, шинэчилснээр гүүрэн дээрх түгжрэлийг арилгах юм.

Дөрөвдүгээрт: Наадамчдын гүүрийг барина. Яармагийн хүн ам ихсэж байгаа учраас наадамчдын гүүрийг Биологийн төв лабораторийн уулзвартай холбоно. Наадамчдын гүүр баригдсанаар Яармагийн гүүрний ачаалал 50 хувь буурна.

Нийслэлийн хэмжээнд 463.1 метр урт гүүрэн байгууламж барина. Энэ ажил 2-3 жил үргэлжилнэ. Үйлдвэрчний районд газар чөлөөлөх, цахилгааны шугамыг өөрчлөх шаардлагатай. Газар чөлөөлөхөд 24.5 тэрбум төгрөг төсөвлөсөн ч газрын эзэдтэй зөвшилцөнө. 

Түүнчлэн 22 зам барьснаар хотын түгжрэл буурна. Бүх замын зураг төсөл нь гарч, тендер зарлагдсан. Гэвч газар чөлөөлөх явцад олон нийтийн зүгээс эсэргүүцэлтэй тулгарах эрсдэл бийг Хотын даргын хэвлэлийн төлөөлөгч Н.Сугар онцлов. Мөн тэрбээр Олимпын гүүрний зэргэлдээ явган хүний гүүрний ажил энэ зун дуусна гэв.       

---