Жастин Трюдо жагсагчдын дансыг царцаана гэв

Канадад гурав дахь долоо хоногтоо үргэлжилж буй эсэргүүцлийн хөдөлгөөнийг зогсоохын тулд Ерөнхий сайд Жастин Трюдо Онцгой байдлын тухай хуулийг хэрэгжүүлж, урьд өмнө байгаагүй алхам хийжээ.

Энэхүү арга хэмжээний хүрээнд, банкнууд жагсаалд оролцсон хүмүүсийн хувийн дансыг шүүхийн шийдвэргүйгээр царцаах боломжтой болох аж. Үүний дээрээс, криптовалют болон олон нийтийн санхүүжилтийн платформыг хамруулах үүднээс "Терроризмыг санхүүжүүлэх" дүрмийг өргөжүүлнэ гэж мэдэгдсэн байна. Мөн жагсагчдын тээврийн хэрэгслийн даатгалыг түдгэлзүүлэх юм.

Ноён Трюдо энэ талаар мэдэгдэхдээ "Энэ бол Канадын иргэдийн аюулгүй байдлыг хангаж, хүмүүсийн ажлын байрыг хамгаалах зорилготой үйлдэл" хэмээн тэмдэглэжээ. Түүнчлэн жагсагчдыг торгож, баривчлан, чухал дэд бүтцийг хамгаалахын тулд цагдаа нарт "илүү их эрх мэдэл, хэрэгсэл" олгоно гэж тэрээр дурдсан байна.

Тус улсын хэд хэдэн хэсэгт цар тахлын эсрэг хязгаарлалтуудыг эсэргүүцсэн жагсаал цуглаанууд үргэлжилж байгаа бөгөөд нийслэл Оттавад хэдэн зуун жагсагч 400-500 ачааны машинаар хотын төвийг 18 хоногийн турш хаагаад байгаа юм. Эсэргүүцлийн хөдөлгөөнд нэгдсэн иргэд мөн Канад-АНУ-ын худалдааны чухал зам болох Виндзор дахь Элчин сайдын гүүрийг долоо хоногийн турш зогсонги байдалд оруулсан бөгөөд хууль сахиулах байгууллагууд өнгөрөгч ням гарагт тэднийг тараажээ.

Эх сурвалж: BBC