Цагаачдыг тээвэрлэж явсан усан онгоц осолдож, 39 хүн сураггүй алга болжээ

АНУ-ын Эргийн хамгаалалтын албаныхан өнгөрөгч бямба гаргийн шөнө Флоридагийн эргийн ойролцоо осолдсон хөлөг онгоцны 39 зорчигчийг эрэн хайсаар байна.

Тодруулбал, Форт Пирс хотоос 72 км-ийн зайд хөмөрсөн усан онгоцны их бие дээр сууж байсан эрэгтэйг загасчид мягмар гаргийн өглөө олж харсан бөгөөд албаныханд яаралтай мэдэгдсэн байна. Тус эрэгтэйн хэлснээр, түүнтэй хамт байсан цагаачдын бүлэг нь Бахамын арлуудын Бимини хэсгээс хөдлөөд удалгүй цаг агаарын таагүй нөхцөл байдалтай таарсан аж.

Бүс нутгийн эрх баригчдын тогтоосноор, зорчигчдын хэн нь ч аврах хантааз өмсөөгүй байсан бөгөөд осолдсон хөлөг онгоц нь "цагаачдыг хууль бусаар хил нэвтрүүлэх" үйл ажиллагааны нэг хэсэг байсан байж магадгүй гэж таамаглаж байгаа юм.

Эрлийн ажиллагааг Майамигийн эргийн хамгаалалтын албанаас удирдан явуулж, хөлөг онгоц, нисдэг тэрэгнүүдийг дайчлан ашиглаж байгаа хэдий ч одоогийн байдлаар өөр амьд үлдсэн хүнийг олоогүй байна.

Эргийн хамгаалалтын албаныхан өнгөрсөн долоо хоногийн баасан гарагт мөн цагаачдыг хууль бусаар тээвэрлэж явсан хөлөг онгоцыг Бахамын арлын баруун хэсгээс саатуулж, Гаитигийн 88 иргэнийг эх орон руу нь буцаасан гэж мэдээлжээ. Тус албаны мэдэгдэлд "Флоридагийн хоолойг хэт их зорчигчтой хөлөн онгоцоор давах гэж оролдох нь маш аюултай бөгөөд хүний амь нас хохирох эрсдэлтэй" гэж анхааруулсан юм.

Эх сурвалж: BBC