Украйн дахь АНУ-ын ЭСЯ-ны ажилтнуудын гэр бүлийг буцахыг тушаажээ
Украйн дахь АНУ-ын Элчин сайдын яамны ажилтнуудын ар гэр, төрөл төрөгсдийг эх орон руугаа буцахыг тус улсын Төрийн департаментаас тушаажээ. Түүнчлэн, зайлшгүй шаардлагатай бус ажилтнуудыг явахыг зөвшөөрсөн бөгөөд Украйн дахь америк иргэдийг нутаг буцахыг уриалсан аж.
Төрийн департаментын албан ёсны мэдэгдэлд, ОХУ Украйны эсрэг томоохон цэргийн ажиллагаа явуулахаар төлөвлөж байгаа гэх мэдээллийг дурдсан байна. Харин Оросын зүгээс ийм төрлийн мэдээллийг эрс няцааж байгаа юм.
Гэвч хурцадмал байдал үргэлжилж байгааг Америкийн албаныхан онцолсон бөгөөд "АНУ-ын иргэд аливаа дарамт, халдлагад өртөж болзошгүй" учир Украйн, Ороос руу зорчихгүй байхыг анхааруулжээ.
АНУ-ын Элчин сайдын яам нээлттэй хэвээр байгаа ч халдлага хэзээ ч болж болзошгүйг Цагаан ордноос анхааруулж байгаа юм. Энэ талаар нэгэн албаны хүн "Ийм гэнэтийн тохиолдолд АНУ-ын Засгийн газар иргэдээ нүүлгэн шилжүүлэх боломжгүй байх болно" хэмээн тэмдэглэсэн байна.
Тэгвэл тус улсын зүгээс сум, хамгаалах төхөөрөмж зэрэг нийт 90 тонн "тусламж"-ийг Украйнд илгээсэн бөгөөд эдгээр нь өнгөрөгч бямба гарагт хүрэлцэн иржээ.
Эх сурвалж: BBC
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.