АНУ-ын Нью Йорк мужийн нэгэн ахлах сургуулийн багш 17 настай сурагчдаа коронавирусийн эсрэг вакцин тарьсан нь ил болсны дараа түүнийг баривчилсан гэж албаны хүмүүс мэдэгджээ.

Биологийн багш мэргэжилтэй Лаура Руссо нь ямар ч хууль ёсны зөвшөөрөлгүй хэдий ч өөрийнхөө гэрт вакцин тарьсан бөгөөд хүүгийн эцэг эхээс зөвшөөрөл аваагүй аж. Гэхдээ түүний сурагч өөрөө вакцин тариулахыг хүссэн гэж Руссо мэдүүлсэн байна.

Цагдаа нар 54 настай багшийг Шинэ жилийн баярын орой баривчилсан бөгөөд түүнийг мэргэжлийн үйл явцыг зөвшөөрөлгүй гүйцэтгэсэн гэх хэрэгт буруутгаж байгаа юм. Шүүх хурал энэ сарын 21-нд товлогдсон ба хэрэв түүний гэм буруутай нь тогтоогдвол тэрээр дөрвөн жилийн хорих ял авч магадгүй аж.

Вакцины тарилга үйлдэх нь өндөр эрсдэлтэй ажил бөгөөд эмч болон тусгай зөвшөөрөлтэй эмнэлгийн ажилтнууд вакциныг хуурамч биш эсэхийг баталгаажуулж, хугацаа нь дууссан эсэхийг шалгах үүрэгтэй байдаг. Хатагтай Руссо ямар вакцин хэрэглэсэн нь одоогоор тодорхойгүй байгаа бөгөөд тус вакциныг хэрхэн олж авсныг албаныхан шалгаж байгаа гэжээ.

АНУ-д одоогийн байдлаар зөвхөн "Пфайзер" вакциныг 18-аас доош насны иргэдэд тарихыг зөвшөөрөөд байгаа юм.

Эх сурвалж: BBC

---