? LIVE: Шатахуунд ус хольсон эсэхийг АМГТГ-аас шалгалаа

Олон нийтийн сүлжээнд шатахуунд ус холин борлуулж байгаа тухай мэдээлэл цацагдаад буй. Олон нийтийг эргэлзүүлсэн энэ мэдээллийн мөрөөр АМГТГ-аас газар дээр нь гэнэтийн шалгалт хийлээ.

Тус газраас өнөөдөр Баянбүрдийн “Тэс Петролиум”, “Петровис” ШТС-нд гэнэтийн шалгалт хийж, шатахууны үзүүлэлтүүд нь чанарын шаардлага хангаж байна гэж дүгнэлээ.

“Тэс Петролиум” ШТС-ын шатахуун түгээгч:

-Манайх жилд нэг удаа шатахууны саваа цэвэрлэдэг. Шатахуун лабораторийн шинжилгээтэйгээ ирдэг. Чанарын шаардлага хангасан тохиолдолд түгээлт хийдэг.

АМГТГ-ын чанарын менежер, шинжээч Ж.Бадамсүрэн:

-Жил бүр орон даяар шатахууны стандартын төлөвлөгөөт үзлэг хийдэг. Коронавирус цар тахалтай холбоотойгоор энэ жил төлөвлөгөөт үзлэг хийгдээгүй. Шалгалтаар шатахуун чанарын шаардлага хангаж байна. Түүвэрлэн 15 ААН-ийн 18 шатахуун түгээх станцаас түлш, бензиний чанарын шалгалт хийсэн. Шалгалтаар зөрчил илрээгүй.

“Тэс Петролиум” ШТС-ын хувьд зөвхөн октан шалгасан бол “Петровис” ШТС-ын хувьд октан болон ус хольсон гэх мэдээллийн дагуу ус мэдрэгчийг шалгав.

АИ-92 агуулж байгаа савнаас ус мэдрэгч бодис түрхэн шалгасан юм. Шатахуунд ус хольсон бол уг бодис нь 1-2 секундын дотор улаан, ягаан өнгөтэй болдог байна. Тэгтэл “Петровис” ШТС-ын АИ-92 агуулж байгаа савнаас ус илрээгүй юм. Ус хольсон байвал хувийн жингээрээ доороо хөлдсөн байх ёстой.

Ер нь шатахууд ус холих ямар ч боломжгүй гэдгийг иргэдэд ойлгох хэрэгтэй. Шатахуунд ус хольсон байвал савны доор хөлдөлт явагдаж, түгээлт хийх боломжгүй. Түүнээс гадна нь  шатахууныг устай холих ямар ч боломжгүй. Ийм бензиныг автомашинд хийсэн тохиолдолд явахгүй гэв.