Австрали: Хийлдэг тоглоомоос унасан дөрвөн хүүхэд нас баржээ

Австралийн Тасмани мужийн Девонпорт хотын нэгэн бага сургуулийн арга хэмжээний үеэр хийлдэг тоглоом салхинд хийссэний улмаас дөрвөн хүүхэд өндрөөс унан нас барж, таван хүүхэд гэмтэж бэртжээ.

Цагдаа нарын мэдээлснээр, сурагчдын дотор нь ороод тоглож байсан хийлдэг тоглоом хүчтэй салхины улмаас хийсэн, агаарт хөөрсөн бөгөөд хүүхдүүд 10 метрийн өндрөөс унасан байна. Албаныхан амиа алдсан хүүхдүүдийн насыг зарлаагүй ч хоёр хүү, хоёр охин нас барсан гэж мэдэгдсэн юм.

Ослын дараа түргэн тусламжийн эмч нар ослын газарт яаралтай ирж, хүүхдүүдэд анхны тусламж үзүүлсэн бөгөөд дараа нь нисдэг тэргээр ойролцоох эмнэлэгт хүргэсэн аж. Хичээлийн жилийн сүүлийн өдрийг тохиолдуулан зохион байгуулсан энэхүү арга хэмжээ ийнхүү эмгэнэлт осол болон хувирсны дараа албаныхан сурагчдын эцэг, эхэд шуурхай мэдэгдсэн бөгөөд орон нутгийн иргэд хүүхдүүдээ авахаар сандралдан гүйж байсныг орон нутгийн хэвлэлүүд мэдээлсэн байна.

Австралийн Ерөнхий сайд Скотт Моррисон уг ослыг "санаанд оромгүй зүрх шимшрүүлсэн явдал" гэж тодорхойлоод, эмгэнэл илэрхийлсэн юм. Мөн Тасманийн Цагдаагийн командлагч Дебби Уильямс "Ослын газар дээр ажиллах үнэхээр хэцүү бөгөөд гунигтай байсан" гэж тэмдэглэжээ.

Эх сурвалж: BBC