Туркийн Ерөнхийлөгчийн ордны зургийг дарсан хосыг тагнуулын хэргээр баривчилжээ

Туркийн Ерөнхийлөгчийн ордны гэрэл зургийг дарсан израйль хосыг орон нутгийн цагдаа нар тагнуул хийсэн гэх хэргээр баривчилжээ. Харин Израйль улсын зүгээс тэднийг нэн даруй суллахыг шаардаж байгаа юм.

Хэргийг тодруулбал, Натали болон Морди Окнин нар өнгөрсөн долоо хоногт Туркийн Камлика цамхаг дахь ресторанаар үйлчлүүлж байхдаа Ерөнхийлөгчийн ордны зургийг авсан бөгөөд үүний дараа тус рестораны ажилтан тэднийг цагдаад мэдэгджээ. Ингээд орон нутгийн прокурорууд тэднээс байцаалт авсныхаа дараа хэргийг шүүхэд шилжүүлсэн бөгөөд шүүгч хосыг "улс төр, цэргийн тагнуул хийсэн" гэж буруутган, хорих хугацааг нь дор хаяж 20 хоногоор сунгасан байна.

Тэгвэл Натали, Морди Окнин нарын израйль өмгөөлөгч энэ ялыг "үндэслэлгүй зүйл" гэж нэрлэн, тэднийг Израйлийн ямар ч агентлагт ажилладаггүй, автобусны жолооч хийдэг энгийн иргэд гэдгийг онцолжээ.

Израйлийн Ерөнхий сайд Нафтали Беннетт энэ талаар "Тэд бол санамсаргүйгээр ээдрээтэй нөхцөл байдалд орсон гэм зэмгүй энгийн иргэд. Өчигдөр би тэдний гэр бүлийнхэнтэй ярилцсан бөгөөд бид асуудлыг шийдвэрлэхийн тулд чадах бүхнээ хийж байна" хэмээн мэдэгдсэн юм.

Израйлийн цэргүүд 2010 онд Туркийн хөлөг онгоцыг сүйрүүлснээс хойш хоёр улсын харилцаа хурцадмал байсаар ирсэн билээ. Өнгөрсөн сард Туркийн хууль хяналтынхан нийт 15 эрэгтэйг Израйлийн Моссад тагнуулын агентлагийн талд ажилласан хэргээр баривчилсан юм.

Эх сурвалж: BBC