Энэтхэг, Балбад үер, хөрсний нуралтын улмаас 116 хүн нас баржээ

Энэтхэг, Балба улсад сүүлийн хэд хоногийн турш үргэлжилсэн их хэмжээний үер, хөрсний нуралтын улмаас 116 хүн амиа алдаж, олон тооны иргэн сураггүй алга болжээ.

Энэтхэгийн хойд хэсэгт орших Уттараханд мужид 46 хүн нас барж, 11 оршин суугч сураггүй алга болсон гэж албаны хүмүүс мэдээлсэн байна. Харин өмнө зүгийн Керала мужид 39 иргэн эндээд байгаа аж. Тус мужийн нэг байшин асар том хэмжээний хөрсний нуралтад дарагдаж, гэр бүлийн таван гишүүн амиа алдсан болохыг орон нутгийн албаны хүн "AFP" агентлагт ярьжээ.

Балба улс даяар мөн сүүлийн гурав хоногт хүчтэй аадар бороо орж, их хэмжээний үер буусны улмаас 31 хүн нас барсан байна. Түүнчлэн, одоогийн байдлаар 43 хүн ор сураггүй алга болсон байгаа аж.

Тус улсын Гамшгийн менежментийн хэлтсийн ажилтан Хумкала Пандей нөхцөл байдлын талаар "Олон газарт бороо орсоор байгаа. Бид бүс нутгийн мэдээллүүдийг нэгтгэн цуглуулсаар байгаа бөгөөд амиа алдагсдын тоо цаашид нэмэгдэж магадгүй" хэмээн тэмдэглэсэн байна.

Эх сурвалж: AFP