Беларусь улс Францын элчин сайдыг хөөжээ
Беларусь Францын элчин сайдыг хөөж, элчин сайд аргагүйн эрхэнд тус улсыг орхин гарсан байна. Өнгөрсөн жил Минскэд суух Франц улсын онц бөгөөд эрхт элчин сайдаар томилогдон ирсэн Николас де Лакосте ням гарагт Беларусийг орхин гарчээ.
57 настай элчин сайд Ерөнхийлөгч Александр Лукашенкод итгэмжлэх жуух бичгээ өргөн барихаас татгалзсан учир улсаасаа хөөх шийдвэр гаргасан гэж орон нутгийн эх сурвалжууд мэдээлсэн байна.
Францаас гадна Европын Холбооны хэд хэдэн улс Лукашенког тус улсын Ерөнхийлөгч гэдгийг хүлээн зөвшөөрөөгүй байгаа юм. Өнгөрсөн наймдугаар сард болсон сонгуульд Лукашенко зургаа дахь удаагаа ялалт байгуулсан гэж үзэж байгаа ч санал хураалт шударга бус явагдсан гэж холбооны улсууд үзжээ.
Ноён Лакосте Ерөнхийлөгчид бараалхахынхаа оронд өнгөрсөн 12 дугаар сард Беларусийн Гадаад хэргийн сайд Владимир Макейд бараалхсан байна. Беларусийн Гадаад хэргийн яам Францын элчин сайдыг 10 дугаар сарын 18-ны өдрөөс өмнө улсыг орхин гарахыг шаарджээ.
Хэдийгээр Европын Холбооны орнууд Лукашенког хүлээн зөвшөөрөхгүй, хориг арга хэмжээ хэрэгжүүлж байгаа ч тэрээр ОХУ-ын Ерөнхийлөгч Владимир Путинтай эргэн холбоотон болсондоо баяртай байгаагаа илэрхийлжээ.
Эх сурвалж: ВВС
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.