Ши Жиньпин Жо Байдентай уулзахаас татгалзжээ

АНУ-ын Ерөнхийлөгч Жо Байден БНХАУ-ын дарга Ши Жиньпинд дээд хэмжээний уулзалт хийх санал тавьсан боловч Хятадын тал зөвшөөрсөн хариу өгөөгүй гэж Их Британийн "Financial Times" сонин энэ сарын 14-ний өдөр мэдээлжээ.

Эх сурвалжуудын хэлснээр Жо Байден энэ сарын 9-ний өдөр Ши Жиньпинтэй 90 минутын турш утсаар ярьсан бөгөөд энэ үеэрээ Америк, Хятадын харилцааны мухардмал байдлыг арилгахын тулд дээд хэмжээний уулзалт хийхийг уриалсан аж. Гэвч Ши Жиньпин Ерөнхийлөгч Байдены саналд хариу өгөөгүй бөгөөд АНУ-ыг Хятадын эсрэг хатуу байр сууриа зөөлрүүлэхийг хүссэн байна.

Жо Байден БНХАУ-ын Тайваньд явуулж буй цэргийн үйл ажиллагаа, Хонконгийн ардчиллын төлөөх хөдөлгөөнийг дарах оролдлого болон тус улс дахь уйгуруудын нөхцөл байдлыг шүүмжлэн, Хятадын эсрэг хатуу байр суурь баримталдаг билээ. Гэсэн хэдий ч Ерөнхийлөгч Байден Ши Жиньпинтэй эерэг харилцаа үүсгэх гэж оролдсоор байгаа бөгөөд энэ удаа дээд хэмжээний уулзалт санал болгохдоо тэр даруй хариу авна гэж бодоогүй нь тодорхой хэмээн нэгэн эх сурвалж тэмдэглэжээ.

Харин Цагаан ордны зүгээс Ши Жиньпиний дээд хэмжээний уулзалтаас татгалзсан шалтгаан нь коронавирустэй холбоотой гэж үзэж байна. Ши Жиньпин цар тахал дэгдэхээс өмнө буюу өнгөрсөн оны 1 дүгээр сарын 18-нд Мьянмарт айлчилснаасаа хойш Хятадаас гараагүй байгаа юм.

Ерөнхийлөгч Байден ирэх сард болох "Их 20"-ийн дээд хэмжээний уулзалтын үеэр Ши Жиньпинтэй ярилцах боломжтой гэж үзэж байсан хэдий ч Хятадын дарга тус арга хэмжээнд оролцохгүй байх төлөвтэй байна. Гэхдээ Жо Байден, Ши Жиньпин нар цахим хэлбэрээр дээд хэмжээний уулзалт хийх магадлалтай гэдгийг холбогдох эх сурвалж онцолжээ.

Эх сурвалж: www.mt.co.kr

Орчуулагч: Г.Энхсаруул