Рианна аавынхаа эсрэг шүүхэд өгсөн гомдлоо цуцалжээ
АНУ-ын алдарт дуучин Рианна аавынхаа эсрэг шүүхэд өгсөн хэргээ хэрэгсэхгүй болгожээ. Тэрээр өөрийн аав Рональд Фентийг 2019 онд шүүхэд өгсөн бөгөөд аав нь түүний нэрийг зөвшөөрөлгүй ашиглаж, хуурамч сурталчилгаа хийн, хувийн нууцад нь халдсан гэж буруутгасан юм.
Түүнчлэн Рональд Фенти Рианнагийн зөвшөөрөлгүйгээр гадаадад аялан тоглолт зохион байгуулахыг оролдсон аж. Робин Рианна Фенти гэх бүтэн нэртэй алдарт дуучин хоёр жилийн өмнө шүүхэд нэхэмжлэл гаргахдаа "Хэдийгээр ноён Фенти Рианнагийн аав боловч түүнд Рианнагийн нэрийн өмнөөс бизнесийн үйл ажиллагаа явуулах эрх мэдэл байхгүй, хэзээ ч байгаагүй" хэмээн мэдэгджээ.
Ноён Фенти 2017 онд Мосеос Перкинс гэх хүнтэй хамтран "Fenty Entertainment" компанийг байгуулсан бөгөөд уг байгууллагыг Рианнатай холбоотой гэж удаа дараа худал сурталчилгаа хийсэн байна.
Уг хэргийн шүүх хурал энэ сарын 22-ны өдөр болох ёстой байсан ч Рианна өнгөрөгч мягмар гарагт хэргийг хэрэгсэхгүй болгох өргөдлөө гаргажээ. Үүний шалтгаан одоогоор тодорхойгүй байгаа хэдий ч Америкийн хэвлэл мэдээллийн хэрэгслээр түүнийг аавтайгаа тохиролцоонд хүрсэн гэж таамаглаж байгаа юм.
Эх сурвалж: BBC
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.