БНАСАУ-ын цэргүүд хамгаалалтын хувцастай жагслаа

Дэлхийн хамгийн хаалттай улс БНАСАУ-ын үүсэн байгуулагдсаны 73 жилийн ой өнөөдөр тохиож байна. Улсын үүсэн байгуулагдсаны өдрийг тохиолдуулан өчигдөр цэргийн жагсаал хийжээ.

Цар тахалтай холбоотойгоор энэ жилийн баярын жагсаалд оролцсон цэргүүд халдвар тархахаас сэргийлсэн хамгаалалтын хувцастай жагссан байна. Мөн Умард Солонгосын гол зэвсэг баллистик пуужинг энэ удаагийн цэргийн жагсаалд оролцуулаагүй ажээ.

Төрийн мэдлийн хэвлэл мэдээллийн агентлагийн олон нийтэд дэлгэсэн зургаас харахад жагсаал шөнө оройн цагаар болсон байна. Удирдагч Ким Жон Ун жагсаалыг үзсэн ба бага зэрэг жин хассан байдалтай, амны хаалтгүйгээр хүүхдүүдтэй тэврэлдсэн харагдаж байна.

Цар тахлын улмаас Умард Солонгосын эдийн засгийн хямрал гүнзгийрч, хүнсний хомсдолд ороод байгаа хэмээн барууны эх сурвалжууд мэдээлсээр байна. Цэргийн жагсаалд баллистик пуужингийн оронд галын машин,трактор, гал сөнөөгчид оролцжээ.

БНХАУ-ын Ерөнхийлөгч Си Зиньпин Умардын удирдагчид баяр хүргэн, мэндчилгээ илгээсэн байна. Хятад нь Умард Солонгосын улс төр, эдийн засгийн гол холбоотон бөгөөд шатахуун, хүнсний нийлүүлэлт нь шууд хамааралтай байдаг. Гэвч цар тахал гарсан даруйд хоёр улс хилээ хааж худалдаа зогссон. Хятад Умард Солонгост коронавирусийн эсрэг 3 сая тун вакцин хандивлахыг хүссэн ч Пхеньян аль ч улсаас вакцин хүлээж авахаас татгалзсан.

Эх сурвалж: ВВС