ХӨСҮТ-ийн Ерөнхий захирал Л.Баттөр “өөрийн хүсэлтээр” өчигдөр орой гэнэт ажлаа өглөө.

Л.Баттөрийн оронд ХӨСҮТ-ийн Ерөнхий захирал асан Д.Нямхүүг томилох байх гэсэн яриа таамаг буруу болж, Улсын хоёрдугаар төв эмнэлгийн Бодлого төлөвлөлт, хөгжлийн асуудал эрхэлсэн дэд захирал Ц.Билэгтсайханыг томилох гэж байгаа гэдгийг ЭМЯ-ны эх сурвалж хэллээ.

ХӨСҮТ-ийн Ерөнхий захирлаар томилогдож буй Ц.Билэгсайхан нь Анагаах ухааны их сургуулийг 2003 онд хүний их эмч мэргэжлээр дүүргэсэн. 2009 онд Анагаах ухааны магистр, 2014 анагаах ухааны докторын зэргийг тус тус хамгаалсан.

Ажлын туршлагын хувьд 2003-2009 онд Эрдэм шинжилгээний ажилтан, 2009-2010 онд Айчи АУС, Зочин судлаач, 2013-2014 онд Оклахомагийн ИС, Докторын дараах судлаач, 2014-2019 онд АШУҮИС, Цөм лаборатори, Эрхлэгч, мэргэжилтэн, 2019-2020онд АШУҮИС, Биохимийн тэнхим, багш, 2020 оны оны гуравдугаар сарын 05-ны өдөр Улсын хоёрдугаар төв эмнэлгийн дэд захирлаар томилогдсон.

Тэрбээр АУҮИС-ийг түшиглэн байгуулсан “Нано мед” эмнэлгийг 100 хувь эзэмшдэг. Мөн үнэртэн, гоо сайхны бүтээгдэхүүн үйлдвэрлэгч “Гарааны дерма лаб” ХХК-ийн 12 хувийг, Гадаад худалдааны чиглэлээр үйл ажиллагаа явуулдаг “БСЖ био тех” ХХК-ийн 33 хувийг тус тус эзэмшдэг.

Жилийн орлого 21 сая төгрөг, гэр бүлийн жилийн орлого 28 сая төгрөг. 45 сая төгрөгийн хадгаламжтай, 261 сая төгрөгөөр үнэлэгдэх хоёр ширхэг орон сууц, нэг зуслангийн байшинтай хэмээн АТГ-т ХОМ-ээ мэдүүлсэн байв.

---