? LIVE: Зохиолч С.Төмөр: Цагдаа нар намайг сандлаас унагаж, хавирга дээр өвдөглөж суусан

Номын баяр 2021 арга хэмжээний үеэр зодуулсан зохиолч С.Төмөр өнөөдөр хэвлэлийн бага хурал хийсэн юм. 

Зохиолч С.Төмөр: Энэ сарын 13-аас хойш фейсбүүкт номын баярын үеэр намайг цагдаа нар хүчирхийлж зодсон тухай мэдээлэл гарч, зургыг тавьсан байсан. Би бодит үнэн явдлыг нийтэд хүргэх гэж энэ хурлыг хийж байна.
Зургаадугаар сарын 11-13 хооронд Номын баяр болсон. Энэ сарын 10-нд энэ үйл ажиллагааг зохион байгуулж байгаа "Номын ертөнц" байгууллага руу залгаад би номоо зарах лангуу, саравч асуусан. Тэгэхэд нэг ч лангуу, саравч байхгүй. Нэг лангуу нь 400 мянган төгрөгөөр түрээслэнэ гэсэн. Тэгээд би 12-нд өөрөө очиж сонирхож явахад түрээслэж чадаагүй хүмүүс тэр саравчны дундуур жижиг сандал тавиад номоо зарж байгааг ажигласан. Ингээд 13-ны 18 цагийн үед өөрийн гурван номоо аваад бусдад танилцуулах, болж өгвөл зарах зорилготой очсон.
Үзэсгэлэн худалдаа ч тарж байсан. Ганц хоёр лангуу хоосон болоод байхаар нь нэг хоосон эзэнгүй сандал, ширээ, нэг бананы хайрцаг дээр номоо тавиад байж байтал хоёр охин ирсэн.
Хорь гаран насны хоёр охин ирээд та энд номоо зарж болохгүй, түрээсийн мөнгө төл, эндээс яв гээд шаардлага тавьсан. Үзэсгэлэн тарах хүртэл хүүхдүүд минь, жаахан сууж болох уу гэхэд болохгүй гар гээд хөөсөн.

Тэгэхээр нь би гарсаан. Сайн дураараа ном зарж байгаа хүмүүсийн хажууд нөгөө бананы хайрцаг дээр номоо тавиад сууж байсан л даа. Гэтэл нөгөө хоёр охин цагдаа дагуулж ирээд намайг баривчлуулах гэсэн. Би өөрөө багаасаа архи тамхи хэрэглэдэггүй эв эрүүл байсан. Сошиалд бичсэн байгаа шиг би согтуу байгаад орилж хашгирсан юм болоогүй.

Цагдаа ирээд надад та энд ном зарж болохгүй. Таныг ном зарж байна гэсэн гомдол ирсэн гээд цагдаагийн путикт очьё гэсэн. Тэгээд би ойлголоо, номоо аваад явья гэсэн. Гэтэл явуулахгүй гээд шууд авч явна гээд маргалдаан болсон. Тэгээд сууж байсан сандал дээрээс чирээд, босгоод толгой руу цохисон, хавирга руу цохьсон. Бөхийн мэх хийгээд газар унагасан. Миний хавирга дээр өвдөглөж суусан. Одоо өвдөөд байгаа. Тэр хоёр цагдаа миний цамцыг урсан. Намайг зүгээр байж байхад халдсан гэж үзэж байгаа.
Яагаад цагдаа нарыг дагаж яваагүй вэ гэхээр цагдаа нар хоёр охины захиалгаар намайг зодож мөнгө нэхэх зорилготой байсан гэж бодож байна.