Их Британийн Ерөнхий сайд Борис Жонсон энэ долоо хоногт болох "Их долоо"-гийн уулзалтын үеэр гишүүн орнуудын удирдагчдыг дэлхийн ард түмнийг коронавирусийн эсрэг бүрэн вакцинжуулах ажилд нэгдэхийг уриалахаар төлөвлөж байгаа аж.

Жонсон ирэх баасан гарагт дэлхийн бусад удирдагчтай уулзахдаа олон улсын дархлаажуулалтын аяныг хэрэгжүүлэхийн ач холбогдлыг онцлон тэмдэглэнэ гэжээ. Тэрээр өнгөрөгч ням гарагт хийсэн мэдэгдэлдээ "Дэлхийн улс орнуудын дайны дараах үеийн хамгийн том сорилт бол "Ковид-19"-ийн цар тахлыг ялан дийлж, хамтын үнэт зүйлдээ тулгуурлан, дэлхийн сэргэлтийг удирдан чиглүүлэх явдал юм. Ирэх оны эцэс гэхэд дэлхий дахиныг вакцинжуулсан байх нь анагаах ухааны түүхэн дэх хамгийн том гавьяа болно" хэмээн тэмдэглэсэн байна.

АНУ-ын Ерөнхийлөгч Жо Байден болон Канад, Франц, Итали, Японы удирдагчид баасан гарагаас Их Британид хүрэлцэн ирж, цар тахлын дараах дэлхийн сэргээн босголтын талаар гурван өдрийн турш хэлэлцэх юм. Үүнээс өмнө АНУ-ын Засгийн газар энэ сарын эцэс гэхэд илүүдэл вакциныхаа 80 сая тунг дэлхийн улс орнуудтай хуваалцахаар төлөвлөж байгаагаа мэдэгдсэн билээ.

Харин Их Британийн эрх баригчид НҮБ-ын дэмжлэгтэйгээр хэрэгжүүлж буй "Ковакс" хөтөлбөрт илүү гарсан вакцины хангамжаа өгнө гэж амласан. Түүнчлэн энэ жилд багтаан хоёр тэрбум гаруй фунт стерлингийн үнэтэй вакциныг бусад улс оронд хандивлахаар төлөвлөж байгаа юм.

Эх сурвалж: Associated Press

---