Д.Сүнжид доктор ХЭҮК-оос юуны учир уйдав

Хүний эрхийн үндэсний комиссын гишүүнээр 2020 оны арваннэгдүгээр сард зургаан жилийн хугацаатай томилогдсон Д.Сүнжид доктор  Үндсэн хуулийн цэцийн гишүүнд нэрээ дэвшүүлсэн нь өнөөдөр ил болов.

МУИС-ийг эрх зүйч мэргэжлээр төгсөж, ХБНГУ-ын Максимилианы их сургуульд магистрийн зэрэг хамгаалсан хэмээн сайшаагдаж, хүний эрхийг хангах, хамгаалах ажилд хамгийн их тохирох хүн хэмээгдэж байсан энэ хүн ХЭҮК-ийн гишүүн хэмээх төрийн өндөр албан тушаалаасаа ердөө зургаан сарын уйдсан нь олны анхаарлыг татах болов.

Тэрбээр ХЭҮК-ын гишүүний ажлаасаа ийм амархан уйдав уу, эсвэл хийх ажлаасаа түвэгшээсэн үү гэдэг нь одоогоор тодорхойгүй байна. Жирийн иргэдийнхээ эрхийг хамгаалахаас халширч байгаа хүн Төрийн өндөр албан тушаалтнуудын гаргасан шийдвэр Үндсэн хуультай нийцэж байгаа эсэх маргааныг яаж шийдвэрлэж чадах вэ дээ хэмээн шүүмжлэх хүмүүс ч бас байна.

ХЭҮК-ын гишүүн нь албан тушаалын цалин хэмээн сард гурван сая орчим төгрөгийг гар дээрээ авдаг, албаны унаа машинаар бас хангагддаг. Ажлын таван өдөр, ажлын цагаар л ажилладаг. Хүний эрх, эрх чөлөө зөрчигдсөн байж болзошгүй асуудлыг шалган тогтоогоод гаргасан Зөвлөмж, Шаардлага нь заавал биелэгдэх шинжтэй зэрэг олон олон давуу талтай.

Тийм байтал Д.Сүнжид доктор хүний эрхийн төлөө чин шударгаар ажиллахаа илэрхийлж, нэрээ дэвшүүлсэн 19 хүнээс шалгарч томилогдсон мөртлөө ердөө зургаахан сарын дараа түүнээсээ уйдаж, Үндсэн хуулийн цэцийн гишүүнд болохоор нэрээ дэвшүүлсэн нь олны шүүмжлэлийг дагуулж байна.