?LIVE: Тяньжинд гацсан 4000 чингэлэг тус бүрт 300-400 ам.доллар нэмэгдэхээр болчихоод байна

Тяньжин боомтод Монголын 4000 чингэлэг гацаад байна. Энэ талаар бид "Монголын тээвэр зуучлагчдын нэгдсэн холбоо"-ны УЗ-ийн дарга Г.Оргил, болон тус холбооны гүйцэтгэх захирал О.Даваасүрэн нартай ярилцлаа.

"Монголын тээвэр зуучлагчдын нэгдсэн холбоо"-ны УЗ-ийн дарга Г.Оргил: 

-Манай холбоо тусгай зөвшөөрөлтэй 70 компанийг эгнээндээ нэгтгэдэг. Тяньжинд манайтай хамгийн ойрхон далайн боомт байдаг. Яг одоогоор манай улсын 4000 чингэлэг гацаад байна. Энэ нь олон шалтгаантай. Хамгийн том шалтгаан нь БНХАУ-ын талаас чингэлгийн галт тэрэг өдөртөө ганцхан удаа явж байна. Үүнийг бид өдөрт ядахад хоёр болгож өгөөч гэж Засгийн газарт хүсэлт хүргүүлээд байна. 

УБТЗ-ын удирдлагатай өнгөрсөн долоо уулзахад "Хятадын талаас удаашралтай байна. Манайд галт тэрэг хангалттай бий. Орж ирвэл саадгүй авчирч чадна" гэж мэдэгдсэн. Чингэлгүүд тус боомт дээр гацахаар түрээс, талбайн хадгалалтын зардал нэмэгдээд байгаа. Энэ нь эцсийн хэрэглэгчид барааны үнэ өссөнөөр тусна. 

-4000 чингэлэг нь зөвхөн танай холбооны гишүүдийн ачаа юм байна. Өөр байгууллага, хувь хүний ачаа бас байгаа юу? 

-Бусад байгууллага болон хувь хүний гэдэг нь Эрээнээс машинаар тээвэрлэдгийг хэлдэг гэж ойлгож болно. Эрээнд анх 30, одоо 100 монгол жолооч ажиллаж байна. Энгийн үед өмнө нь өдөрт 250-300 машин ачаа нааш гардаг байсан бол одоо энэ нь ингэж буурсанаар Эрээнд ачаа бас л овоорчихоод байна. Үүнээс болж үнэ өссөн. Нэг машиныг 40 мянган юаниар тээвэрлэж, оруулж ирж байна. Манай Засгийн газар үүнд оролцож, холбогдох гэрээ хэлэлцээр, уулзалтыг хийж, зохицуулах шаардлагатай. Манай холбоонд эдгээр жолооч нарыг хариуцуулж өгвөл бид стандарт тогтоож, хариуцлагын даатгал хийх боломжтой. Чөлөөт зах зээл гэж хаямааргүй байна. 

Бас нэг чухал асуудал байгаа нь Алтанбулаг боомтоор орж ирж буй ачааны машины чиргүүлийг манай талаас татаж авч байгаа. Бас л үнэ өсгөж байгаа явдал. Үүн дээр Засгийн газраас шинэ журам гаргах шаардлагатай байна. 

"Монголын тээвэр зуучлагчдын нэгдсэн холбоо"-ны Гүйцэтгэх захирал О.Даваасүрэн: 

-Тяньжинд гацаад байгаа 4000 чингэлгийг яаралтай татаж авахгүй бол түргэн муудах бүтээгдэхүүн багагүй байгаа. Мөн, бид энд ирсэн чингэлгийг аль болох түргэн буцааж явуулах ёстой. Гэтэл үүн дээр бас л түгжрэл үүссэнээс Монгол улс руу чингэлэг явуулах дургүй байх хандлага байна. 

Өнгөрсөн долоо хоногт бидэнд чингэлэг тус бүрт багадаа 300-400 ам.доллар нэмэгдэнэ гэдгээ мэдэгдсэн. Энэ нь эцсийн хэрэглэгчийн халааснаас гарах өртөг болно. Иргэд үүнийг ойлгох хэрэгтэй.