БНСУ: Вакцины гаж нөлөө илэрсэн хүмүүст 10 сая вон өгнө
Өмнөд Солонгосын эрх баригчид коронавирусийн эсрэг вакцин тариулсныхаа дараа эмнэлэгт хэвтэх шаардлагатай болсон иргэдэд 10 сая вон хүртэлх нөхөн төлбөр олгоно гэж өнгөрөгч даваа гарагт мэдэгджээ.
Энэ сарын 17-ноос эхлэх энэхүү шинэчилсэн хөтөлбөрийн хүрээнд өвчтөнд илэрсэн гаж нөлөө нь вакцинтай холбоотой эсэх нь батлагдаагүй байсан ч нөхөн төлбөрийг олгоно гэж БНСУ-ын Халдварт өвчнийг хянах, урьдчилан сэргийлэх агентлагаас мэдээлсэн байна. Өмнө нь коронавирусийн вакцин болон илэрсэн гаж нөлөө нь хоорондоо хамааралтай гэж тогтоогдсон тохиолдолд л тус улсын Засгийн газраас эмнэлэгт хэвтэх болон бусад төрлийн эмчилгээний зардлыг хариуцаж байсан аж.
Одоогийн байдлаар тус улсад вакцины дараах гаж нөлөөний 156 тохиолдол бүртгэгдсэн хэдий ч зөвхөн хоёр тохиолдол нь коронавирусийн вакцинжуулалтаас хамааралтай гэсэн дүгнэлт гарсан байна. Гэвч дархлаажуулалтын явцыг хурдасган, олон нийтийн дундах түгшүүрийг бууруулахын тулд орон нутгийн эрх баригчид болзошгүй гаж нөлөөнд бүрэн дэмжлэг үзүүлэхээ амлаад байгаа юм.
Үүний хүрээнд цар тахлын эсрэг вакцин хийлгэсний улмаас тахир дутуу болсон эсвэл нас барсан иргэд, ар гэрт нь 430 сая вон хүртэлх тэтгэмж олгох гэнэ.
Өнөөдрийг хүртэл тус улсад вакцин хийлгэсний дараах гаж нөлөөний нийт 19,705 тохиолдол бүртгэгдсэн боловч үүний 96.4 хувь нь хөнгөн шинж тэмдгүүд аж. Харин вакцины дараах нас баралтын 95 тохиолдол бүртгэгдсэн хэдий ч эдгээр иргэдийн үхлийн шалтгаан тодорхойгүй хэвээр байгаа юм.
Эх сурвалж: Yonhap News Agency
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.