БИЧЛЭГ: Д.Амарбаясгалан: Н.Алтанхуяг гэдэг хүнийг дарга болгохын төлөө ард түмэн зовох ёсгүй

Монгол ардын нам /МАН/-ын Ерөнхий нарийн бичгийн дарга Д.Амарбаясгалан улс төрд өрнөөд байгаа хурцадмал байдал, тухайлбал, УИХ дахь АН-ын бүлгийн гишүүд Сүхбаатарын талбайд суулт зарлаад байгаатай холбогдуулан тайлбар өглөө. 

-Ардчилсан нам суулт зарлалаа. Эрх баригч МАН бүртгэл болон сонгуулийн байгууллагад нөлөөлж байна гэж ярьж байна. Энэ талаарх таны байр суурь?

МАН-ын Ерөнхий нарийн бичгийн дарга Д.Амарбаясгалан: 

-Өөрийн бурууд бүдэрвэл хүний зөвд уйлдаггүй гэдэг ардын зүйр үг байдаг. Намын дотоод асуудлаа шийдэж, эв нэгдлээ ханган, Үндсэн хууль болон бусад хуулийг сахих шаардлагатай. 

Намайг арван настай, мэдээ ороход Н.Алтанхуяг нарын хүмүүс улс төрд явж байсан. Энэ хүмүүс 30 жил улс төр хийж явлаа. Яагаад төлөвшдөггүй юм бэ? Монгол улс хөгжмөөр байна. Ард иргэд чинээлэг амьдрахыг хүсэж байна. Энэ бүхний саад тушаа болж 30 жил явж ирчихээд өнөөдөр нөгөө л шударга ёсоо ярьчихсан явж байна шүү дээ. 

Н.Алтанхуяг Ерөнхий сайд байхаар шударга байдаг, биш байхаар шударга бус болчихдог байж болохгүй. Би дарга байвал шударга, дарга биш бол шударга биш гэж үзэж байгаад залуу хүний хувьд тааламжтай биш санагдаж байна. Энэ үйлдлийг таслан зогсоох хэрэгтэй. 

Бидэнд Ковидоос өгсүүлээд зовох шалтгаан мундахгүй олон байна. Хэн нэгнийг дарга болгохын төлөө ард түмэн зовох ёсгүй. Улс төрийн намууд энэ соёлгүй байдлаа таслан зогсоох ёстой. Төрийн тэргүүний сонгох сонгуульд монголын ард түмэн төрөө дээдэлж оролцох ёстой. Үүний төлөө МАН хичээн ажиллах болно гэв.