Баруун Виржиниа муж вакцин тариулсан залуучуудад $100 өгнө

АНУ-ын Баруун Виржиниа мужийн эрх баригчид коронавирусийн эсрэг вакцин тариулсан 16-35 насны оршин суугчдад 100 ам.долларын хадгаламжийн бонд өгөхөөр болсноо мэдэгджээ. Энэ нь тус мужийн залуучууд вакцинжуулалтад илүү идэвхтэй хамрагдах "түлхэц" болно гэж албаныхан найдаж байгаа юм.

Мужийн амбан захирагч Жим Жастис "Цар тахлыг ялан дийлэхэд манай залуучууд хэчнээн чухал болохоо хараахан ойлгохгүй байх шиг байна" хэмээн тэмдэглэжээ. Баруун Виржиниа нь дархлаажуулалтын түвшнээрээ АНУ-ын тэргүүлэх мужуудын нэг байсан боловч сүүлийн хэдэн долоо хоногт вакцин тарилгын явц удааширсан байна. Энэ нь залуучууд вакцин тариулах асуудал дээр эргэлзээтэй хандаж, хэт болгоомжилж байгаатай холбоотой аж.

Тэгвэл энэхүү урамшууллын хөтөлбөр нь 16-35 насны бүлэгт багтах хүмүүс вакцин хийлгэсэн тохиолдолд 100 ам.долларын хадгаламжийн бондыг хүүтэй нь авах боломжийг олгох юм. Түүнчлэн аль хэдийн вакцинжуулалтад хамрагдсан залуучуудад ч мөн мөнгөн урамшууллыг өгөх аж.

АНУ-д одоо 16-аас дээш насны бүх хүн цар тахлын эсрэг вакцин тариулах боломжтой болоод байгаа билээ. Гэвч судалгаанаас харахад залуучууд вакцинжуулалтын тал дээр ахмад настнуудаас илүү эргэлзээтэй байгаа аж. Тус улсын 18-29 насны иргэдийн 25 хувь нь вакцин тариулахаасаа өмнө харзнах хүсэлтэй байгаагаа илэрхийлжээ.

Эх сурвалж: BBC