Б.Жавхлан: Спутник-V вакцины эхний татан авалтыг тээвэрлэх онгоцоо бэлдсэн байгаа

УИХ-ын Нийгмийн бодлогын байнгын хорооны хуралдааны үеэр вакцины татан авалтын талаар Сангийн сайд Б.Жавхлан мэдээлэл өглөө.

Тэрбээр “Сангийн яамны хувьд вакцин худалдаж авах төлбөрийг бүрэн хариуцаж байгаа. Төлбөр тооцооны хувьд бүгдийг нь төлөөд явж байгаа. "Ковакс" хөтөлбөрийн хүрээнд ирэх долдугаар сард вакцин нийлүүлэх боломжтой гэсэн. Манай улс долдугаар сарыг хүлээх боломжгүй тул вакцины худалдан авалтыг эрчимжүүлж эхэлсэн. БНХАУ-ын Синофарм үйлдвэрийн Вероселл вакциныг худалдан авч ирэх тавдугаар сарын 15-н гэхэд нийслэл хотын насанд хүрсэн иргэдээ вакцинд хамруулж дуусгана. Ирэх зургаадугаар сар гэхэд нийт хүн амынхаа 60 хувийг I, II тунд хамруулж дуусгахаар төлөвлөсөн.

ОХУ-ын спутник-V вакцины үйлдвэртэй нэ сая тун вакцин худалдан авах гэрээ хийсэн. Тус вакцины үйлдвэрт асуудал үүссэн тул татан авалт хүлээгдэж байна. Энэ долоо хоногт вакцины эхний татан авалтаа хийх тал дээр хоёр талаас бүх хүчин чадлаа дайчлан ажиллахаар болж, манай улс вакцин тээвэрлэн авчрах онгоцоо бэлдсэн байгаа.

Спутник-V вакцин нийлүүлэх тал дээр манай улсаас саатсан зүйл байхгүй. Бүх төлбөр тооцоог хийсэн. Цаад нийлүүлэгч талаас удаж байгааг ойлгох хэрэгтэй” гэсэн юм.