Хонконгийн 90 настай чинээлэг эмэгтэйн 32 сая ам.долларыг залилжээ

Хонконгийн баячуудын хороололд гэр бүлээсээ тусдаа, ганцаараа амьдардаг 90 настай эмэгтэй луйварчдад 250 сая хонконг доллар буюу 32 сая ам.доллараа залилуулсан хэрэг гарчээ. Өндөр настай чинээлэг эмэгтэйг залилсан этгээдүүд өөрсдийгөө эх газрын Хятадын хууль хүчний байгууллагын ажилтнууд хэмээн итгүүлсэн байна.

Хамгийн анх 2020 оны наймдугаар сард БНХАУ-ын хууль хяналтын байгууллагыг төлөөлсөн мэхлэгчид эмэгтэй рүү залган, түүний нэрийг ашиглан гэмт хэрэг үйлдэгдэж байгаа талаар дуулгажээ. Үүгээр зогсохгүй биечлэн гэрт нь ирж уулзахдаа зөвхөн тэдэнтэй холбогдож болох гар утас үлдээсэн байна. Мэхлэгчдэд итгэсэн эмэгтэй хэргийн мөрдөн шалгах ажилд туслахын тулд нийт 11 удаа мөнгө шилжүүлснийхээ эцэст гуравдугаар сарын 2-ны өдөр Хонконгийн цагдаа газарт болсон явдлын талаар мэдүүлжээ.

Улмаар цагдаа нар гуравдугаар сарын 25-ны өдөр 19 настай эрэгтэйг уг хэрэгт холбогдуулан баривчлан саатуулсан байна. Тэрээр батлан даалтад суллагдсан бөгөөд шүүх хурал нь энэ сарын сүүлээр болохоор товлогджээ. Хэрэгт холбогдолтой байж болох бусад хүмүүсийг нэмж баривчилж магадгүй гэдгийг цагдаа нар мэдэгдсэн юм.

2020 онд 65 настай хонконг эмэгтэйг эх газрын Хятадад мөнгө угаах гэмт хэрэгт холбогдсон хэмээн хуурч есөн сая ам.долларыг нь залилсан хэрэг гарч байжээ. Уг хэрэгт гурван эрэгтэйг холбогдуулан баривчилсан байдаг. Мөн 2019 онд 85 настай эрэгтэй хуурамч алтны хэрэгт 73 сая ам.доллараа алдаж байжээ.

Эх сурвалж: ВВС, CNN