НОК: Хөл хорионы өдрүүдэд хотын иргэд дараах журмыг мөрдөнө

Засгийн газрын 2021 оны дөрөвдүгээр сарын 9-ний өдрийн хуралдаанаар энэ сарын 10-ны өдрөөс эхлэн 15 хоногийн хугацаанд улсын хэмжээнд хэсэгчилсэн бүх нийтийн бэлэн байдлын зэрэгт шилжүүлэх шийдвэрийг гаргасан.  

Дээрх хугацаанд нийслэлийн иргэд ямар журамд захирагдах талаар НОК-оос гаргасан шийдвэрийг Нийслэлийн засаг дарга бөгөөд Улаанбаатар хотын захирагч Д.Сумъяабазар танилцууллаа. 

Үүнд: 

-Иргэд гэрийн ойролцоох дэлгүүрээс хүнс, түлш, зөөврийн ус, ахуйн хэрэглээний бараа бүтээгдэхүүнээ авна.

-Эмнэлгийн тусламж, үйлчилгээ авах, эмийн сангаар үйлчлүүлэх, буяны ажилд оролцох /30 хүртэлх хүн оролцох/, газар тариалан эрхлэх, шинжилгээ өгөх болон дархлаажуулалтад хамрагдах боломжтой.

-18 градусаас дээш агууламжтай согтууруулах ундааны зүйлс, түүгээр үйлчлэхийг хориглоно.

-Хязгаарлалт тогтоохгүй салбарын үйл ажиллагаа 07:00-21:00 цагийн хооронд явагдана.

-Хязгаарлалттай тоо буюу нэг дор таваас илүү хүн цугларахыг хориглоно.

-Оршин суугаа газрынхаа ойролцоо дугуй унах, биеийн тамирын дасгал хөдөлгөөн хийх эрхтэй. 

Автомашин тэгш, сондгойгоор зорчино

-Төрийн байгууллага, хуулийн этгээдийн 10 хүртэл хувийг ажиллуулна. Ингэхдээ ажлын газрын үнэмлэх, албан байгууллагын тодорхойлолтыг үндэслэн хувийн болон тээврийн хэрэгслээр зорчихыг зөвшөөрнө.

-Тээврийн хэрэгслийг хуанлийн өдрөөр автомашины улсын дугаарын сүүлчийн оронг тэгш сондгойгоор хуваарилан явуулна. Гэхдээ зөвхөн тусгай маршрутаар зорчино.

-Нийтийн тээврийн хэрэгсэл өглөө 06:30-10:00, өдөр 12:30-15:00, орой 17:20-22:00 цагийн хооронд зөвхөн ажиллах шаардлагатай салбарын ажилчдыг тээвэрлэнэ.