Жастин Трюдогийн эдлэнд нэвтэрсэн этгээдэд зургаан жилийн хорих ял оноожээ

Канадын Ерөнхий сайд Жастин Трюдогийн амьдардаг "Rideau Hall" эдлэн газарт зэвсэгтэй нэвтэрсэн этгээдэд зургаан жилийн хорих ял ногдуулжээ. Хэрэгтэн Кори Хуррен өнгөрсөн сард зэвсгийн хэргийн долоон зүйл анги болон үл хөдлөх хөрөнгөд хохирол учруулсан гэх хэргээр гэм буруугаа хүлээсэн байна.

Цэргийн нөөцийн алба хаагч Хуррен 2020 оны долдугаар сард Жастин Трюдог "баривчлах"-аар түүний эдлэн газрын хашааны хаалгыг автомашинаараа дайран, нэвтэрчээ. Дараа нь тэрээр ямар ч эсэргүүцэл үзүүлэлгүйгээр албаныханд бууж өгсөн байна. 46 настай Хуррен хэд хэдэн буугаар зэвсэглэсэн байсан бөгөөд үүний дунд хууль бус галт зэвсэг байжээ. Хэрэг гарах үеэр Ерөнхий сайд болон түүний гэр бүл эдлэн газарт байгаагүй аж.

Хууль сахиулагчид эхэндээ түүнд зэвсгийн хамааралтай нийт 21 хэрэг үүсгэсэн бөгөөд мөн халдлагын дараа ноён Трюдог заналхийлсэн хэрэгт буруутгаж байсан юм. Прокурорууд Кори Хурреныг нийгэмд аюул учруулах магадлалтай гэж үзэн, зургаан жилийн хорих ял оноохыг шүүхээс хүссэн байна. Харин түүний өмгөөлөгчид коронавирусийн цар тахал Хурренд сөргөөр нөлөөлсөн гэж маргасан бөгөөд түүнийг цэргийн алба хааж буйг онцолсон байна.

Энэхүү халдлагаас хоёр сарын өмнө Ерөнхий сайд Жастин Трюдогийн Либерал Засгийн газар 1,500 төрлийн зэвсгийг худалдах, ашиглахыг хориглохоо мэдэгдсэн билээ. Үүний улмаас тус улсын Нова Скотиа мужид өргөн хэмжээний гал зэвсэгтэй үймээн самуун болж, Канадын түүхэн дэх хамгийн олон хүний аминд хүрсэн галт зэвсгийн халдлага болсон юм.

Эх сурвалж: BBC