АНУ-ын мичнүүд коронавирусийн вакцин хийлгэсэн анхны амьтад болов
АНУ-ын Сан Диего хотын амьтны хүрээлэнгийн хэд хэдэн мичэнд өнгөрсөн долоо хоногт амьтдад зориулсан туршилтын вакцин тарьсан бөгөөд ингэснээр тэд коронавирусийн вакцинжуулалтад хамрагдсан анхны амьтад болжээ.
Тус амьтны хүрээлэнгийн Сафари хүрээлэнгийн найман горилла өнгөрөгч нэгдүгээр сард коронавирусээр өвчилсөн билээ. Мичнүүд хоёрдугаар сарын дундуур бүрэн эдгэрсэн хэдий ч амьтны хүрээлэнгийн горилла болон бусад сармагчнууд цаашид халдвар авахаас урьдчилан сэргийлэхийн тулд вакцин хийх ажлыг мэргэжилтнүүд санаачилсан байна.
Туршилтын вакциныг "Zoetis" малын эмийн үйлдвэр боловсруулсан бөгөөд тус вакцин нь хүний хэрэглээнд тохирохгүй аж. Нийтдээ есөн мич буюу дөрвөн орангутан, таван бонобо сармагчин вакцин тариулсан бөгөөд тэдний дунд 1994 онд зүрхний нээлттэй мэс засал хийлгэсэн дэлхийн анхны мич болсон Карен хэмээх орангутан багтжээ.
АНУ-ын "Pfizer", "Moderna" болон "Johnson & Johnson" зэрэг вакцинуудыг бүгдийг нь сармагчин дээр туршиж үзсэн хэдий ч Сан Диего дахь амьтны хүрээлэнгийн мичнүүдэд тарьсан вакцин нь тэдэнд тусгайлан зориулагдсан байна. Одоогоор байгальд 5,000 хүрэхгүй горилла үлдсэн бөгөөд сармагчнууд сүргээрээ амьдардаг тул ганцхан мич коронавирусээр өвчилсөн тохиолдолд халдвар хурдацтай тархаж болзошгүй гэж судлаачид санаа зовж байгаа аж.
Эх сурвалж: Insider
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.