Африк тивийн өмнөд хэсгийн Бүгд Найрамдах Зимбабве Улс өнгөрөгч даваа гарагт БНХАУ-аас хандивласан 200 мянган тун "Sinopharm" коронавирусийн эсрэг вакциныг хүлээн авчээ.

Эдгээр тунг ашиглан энэ долоо хоногоос иргэдээ вакцинжуулж эхэлнэ гэж Ерөнхийлөгч Эммерсон Дамбудзо Мнангагва өөрийн албан ёсны Твиттер хуудаснаа мэдэгдсэн юм. Вакциныг хүлээн авсан төлөөлөгчдийн тэргүүн, тус улсын Дэд ерөнхийлөгч Константино Чивенгагийн хэлснээр эрүүл мэндийн салбарын ажилтнуудыг хамгийн түрүүнд вакцинжуулалтад хамруулах аж. Тэрээр "Энэ бол цаг үеэ олсон хандив. Манай иргэд энэ цар тахлын гамшигт ихээр нэрвэгдсэн. Цар тахлын үеийн эдийн засгийн хүнд хэцүү ачааг үүрч байсан хүмүүс вакцины тусламжтайгаар шинэ хуудас нээх боломжтой болно" хэмээн тэмдэглэжээ.

Түүнчлэн БНХАУ-аас нэмэлт 600 мянган тунг ирэх гуравдугаар сарын эхээр авахаар төлөвлөж байгаа талаар Мэдээллийн сайд Моника Муцвангва өнгөрсөн долоо хоногт мэдэгдсэн. Эдийн засгийн бэрхшээлтэй тулгараад байгаа Зимбабве Улс энэхүү вакциныг хэр их хэмжээний өртгөөр худалдаж авч байгаа нь одоогоор тодорхойгүй байна.

Зимбабве Улс вакцин худалдан авахад зориулж 100 сая ам.долларын төсөв баталсан бөгөөд нийт хүн амынхаа 60 орчим хувийг дархлаажуулах зорилгоор 20 сая тун худалдан авахаар төлөвлөж байгаа юм. Сангийн сайд Мтули Нкубегийн хэлснээр БНХАУ-аас 1.8 сая орчим вакцины тунг авах аж. Баруун Африкийн Сенегал улс өнгөрсөн долоо хоногт "Sinopharm" вакцины 200 мянган тунг 3.7 сая ам.доллароор худалдаж авсан бөгөөд энэ нь тун бүрд бараг 19 ам.доллар төлсөн гэсэн үг юм.

Эх сурвалж: CNN

---