Словени улсын Поклжука хотноо биатлоны насанд хүрэгчдийн дэлхийн аварга шалгаруулах тэмцээн өчигдөр албан ёсоор эхэллээ.
Биатлоны дэлхийн аварга шалгаруулах анхны тэмцээн 1958 онд Австри улсад зохиогдож эхлэхдээ зөвхөн эрэгтэйчүүдийн ангиллаар зохион байгуулагдаж байжээ. Харин 1984 оноос эмэгтэй биатлончдын ДАШТ тусдаа зохиогдох болж, 1989 оноос эрэгтэй, эмэгтэй ДАШТ хамтдаа зохион байгуулагдах болсон байна.
Энэ удаагийн ДАШТ-ий нэг онцлог нь биатлоны спортоор дэлхийд тэргүүлэгч ОХУ-ын баг, тамирчид дэлхийн допингийн агентлагийн (WADA) шийдвэрийн дагуу улсынхаа нэр, туг, төрийн дууллыг ашиглах боломжгүй бөгөөд "төвийг сахисан баг, тамирчин" статустай оролцохоор болсон байна.
ДАШТ-ий эхний өдөр 4х7.5км холимог буухиа уралдаанаар эхэлж Норвеги улсын баг алт, Авсрийн баг мөнгө, Шведийн баг хүрэл медаль хүртлээ.
Тэмцээн хуваарийн дагуу өнөөдөр /хоёрдугаар сарын 11/ өнжих ба 12-ны өдөр эрэгэтэйчүүдийн 10км гүйлтийн төрлөөр үргэлжлэн явагдана.
