Марокко улсад хүчтэй аадар бороо орсны улмаас газар доорх хууль бус нэхмэлийн үйлдвэр үерт автаж, дор хаяж 24 хүн нас барсан гэж эрх баригчид мэдээлэв.

Танжер хотын нэгэн байшингийн хонгилд байрлах тус үйлдвэрээс 10 хүнийг аварсан байна. Үер болох үед энэхүү барилгад хэдэн хүн байсан нь одоогоор тодорхойгүй байгаа юм. Аврах албаныхан одоог хүртэл хэргийн газарт байгаа бөгөөд мөрдөн байцаалтын ажиллагаа эхэлсэн байна.

Орон нутгийн хэвлэлийн мэдээлснээр үйлдвэрт хүмүүс ажиллаж байх үеэр байшингийн хонгил руу ус цутгаж эхэлсэн байна. Хонгил дотор гацсан иргэдийн заримыг нь орон нутгийн нэгэн оршин суугч олсоор татан гаргаж, амийг нь аварсан болохыг "AFP" агентлаг мэдээлсэн юм. Амиа алдсан хүмүүс бүгд 20-40 насны иргэд байсан гэж Засгийн газрын албан тушаалтан тэмдэглэжээ.

Мароккогийн нэхмэл, арьс ширний үйлдвэрүүд албан бус үйл ажиллагаа явуулах нь элбэг байдаг бөгөөд зохицуулалтгүй үйлдвэрүүдийн улмаас ажилчдын аюулгүй байдал алдагддаг байна.

Эх сурвалж: BBC

---