LIVE: Г.Эрдэмхишиг: 20000 төгрөгөөр тендерээр авах гээд байгаа маскийг Монголдоо 3500 төгрөгөөр үйлдвэрлэж байна

"Эрбум" ХХК-ийн менежер Г.Эрдэмхишигтэй нэг бүрийг нь 20 мянган төгрөгөөр авахаар зарласан 400 сая төгрөгийн өртөг бүхий НЭМГ-ийн тендерийн талаар ярилцлаа. Тус компанийнхан тендерийн материалыг авч үзэхэд яг өөрсдийнх нь үйлдвэрлэдэгтэй адил стандартын маск байжээ. Монголдоо 3500 төгрөгөөр авч болох маскийг юуны учир 20 мянгаар авахаар тендер зарласан юм бол?! 

"Эрбум" ХХК-ийн менежер Г.Эрдэмхишиг: 

-N95 маск нь америк стандартын маск юм. Дэлхийн стандартад нийцсэн, дөрвөн давхар шүүлтүүртэй. Манай компани тэрхүү НЭМГ-ын тендерийн материалыг авч үзсэн. Яагаад нэг бүрийг нь 20 000 төгрөгөөр авна гэсэн юм бол. Дэлхийд байхгүй маск юм болов уу. Сансар огторгуйд өгч явуулах гэж байгаа юм болов уу гэдгийг нь шалгасан л даа. Гэтэл яг манайд үйлдвэрлэдэг масктай адил стандарт байна лээ. Ялгаатай нь ариутгах ёстой гэсэн байсан. Эмнэлэг рүү орохдоо хувцас, хэрэглэлээ ариутгадаг шиг ариутгалтай байх ёстой гэсэн байсан. Тэгэхээр энэ бол шинэ зүйл ч юм уу, өөр зүйл биш. 

Манайд энэ стандартын маскийг 3500 төгрөгөөр зарж байгаа. N95 маскны стандарт, орц нь интернэтэд нээлттэй байдаг. amazon.com, ebay.com дээр та бүхэн ороод харж болно. $2.8 зарж байгааг мэдэж болно. 

НЭМГ хэрэв үндэсний үйлдвэрлэгчдэдээ энэ тендерээ өгсөн бол бид зээлээ төлнө, техник технологио шинэчилнэ, ажилчдын тоогоо нэмэх боломжтой байсан гэв.