LIVE: Хуульч Б.Пүрэвсүрэн: Хоёр тамирчин амиа алдсан хэрэгт сэтгүүлчид хүний эрх зөрчиж байна

Глоб интернэйшнл" ТББ-ын хуульч Б.Пүрэвсүрэнтэй хоёр тамирчин амиа алдсан хэрэг дээр зарим сэтгүүлч хэрхэн хүний эрх зөрчиж байгаа талаар ярилцлаа

Хэвлэл мэдээллийн хэрэгсэл гэхгүй иргэн бүр аливаа төрлийн мэдээллийг түгээх, нийтлэхдээ хүний эрхийг хангаж, хамгаалах шаардлагатай байдаг. Тухайлбал Монгол Улсын хэвлэл мэдээллийн тухай хуульд болон ОУ-ын гэрээ, конвенцоор хүний алдар хүнд, ажил хэргийн нэр хүндийг хамгаалсан, хувийн нууц, гэр бүл, захидал харилцааны нууц, халдашгүй эрхийг хамгаалсан байдаг. Саяхан гарсан үйл явдал дээр хэвлэл мэдээллийн хэрэгслүүд хэд хэдэн алдаа гаргасан. Жишээ нь аливаа этгээдтэй холбоотой мэдээллийг “дуулиантайгаар” тараахаас татгалзах ёс зүйн зарчим байдаг. Мөн хувийн нууцад хүндэтгэлтэй хандана гэсэн 2015 онд Монголын хэвлэл мэдээллийн зөвлөлөөс 10 зүйл заалттай баталсан ёс зүйн зарчим байгаа. Эдгээрийг зөрчсөн байна.

Тухайн хэвлэл эдгээр зарчмыг зөрчсөн бол Монголын хэвлэл мэдээллийн зөвлөлд гомдол гаргаж шийдүүлэх боломжтой. Хэвлэлийн зөвлөлөөс залруулга гаргах, зөөлөн зохицуулалтын шийдвэрүүд авч явдаг.

Мөн эрүүгийн хуулийн 13.6 буюу бусдын орон байранд зөвшөөрөлгүй нэвтрэн орж гэрэл зураг, дуу дүрс, бичлэгээр баримтжуулах, Зөрчлийн хуулийн 6.2 зүйлээр бусдын орон байрны зураг, дүрсийг зөвшөөрөлгүй авах, үүнд гаднах талбай, тохижолт, хаяг зэргийг багтаан заасан зүйлүүдийг зөрчсөн байна.

Хоёр тамирчин амиа алдсан харамсалтай хэрэгт хэвлэл мэдээллийн зүгээс дээрх хуулиудыг зөрчсөнөөс гадна нэр ус, албан тушаал, орон байр гээд хувь хүний халдашгүй эрхийг зөрчсөн. Талийгаач нарын нэр, ажил, сургууль гээд мэдээллүүдийг нээлттэй зарласан байдал дээр зөвхөн ар гэр гэхгүй иргэн бүр гомдол гаргах эрх нээлттэй байдаг шүү.

Сэтгүүлчид ёс зүйн зарчимаа, хуулиа мэдэхгүй биш мэдсээр байж “Дуулиан” гэдэг зүйлийн ардаас хөөж хүнлэг бус зан гаргаж, хүний эрх зөрчиж байгаа юм.