Ковид-19 цар тахлаар дэлхий дээр 100 сая орчим хүн халдварлаж, 2 сая гаруй хүн нас бараад байна. Манай улсад халдварын 1627 тохиолдол өнөөдрийн байдлаар бүртгэгджээ. Засгийн газрын шийдвэрээр удаан хугацаанд хаалттай байсан олон нийтийн үйлчилгээний газрууд, үсчин гоо сайхан, зоогийн газар зэрэг эрсдэл өндөртэй газрууд үйл ажиллагаагаа дахин нээсэнтэй холбогдуулан ЭМЯ-аас иргэддээ дараах зөвлөмжийг хүргэж байна. Хэрэв та зайлшгүй шалтгаанаар гадуур гарсан бол гэртээ орохдоо дараах зөвлөмжийг дагаж мөрдөн өөрийгөө болон хайртай хүмүүсээ халдварт цар тахлаас хамгаалаарай!

Гэртээ орох үедээ:

• Гэртээ гадуур өмссөн гуталтай явахгүй байх
• Хувцсаа гэртээ сэгсрэхгүй байх
• Хэрэглэсэн нэг удаагийн амны хаалтыг уутанд хийж, тагтай хогийн саванд хаях
• Бага насны хүүхдийг тэвэрч, үнсэхгүй байх
• Гараа савандаж угааж халдваргүйжүүлсний дараа хүүхэдтэйгээ харьцах
• Давс, сода, нимбэгний уусмалаар ам, хоолойгоо зайлах
• Даавуун амны хаалтыг савандаж угааж, индүүдэх

Гэртээ байх үед:

• Худалдаж авсан бүтээгдэхүүний сав, баглаа боодлыг сайтар арчих
• Жимс, хүнсний ногоог урсгал усанд сайтар угаах
• Хүний гар олон хүрэлцдэг хэсгийг угааж цэвэрлэх, халдваргүйжүүлэх
• Ор хөнжлийн даавуу, алчуурыг угааж, индүүдэж хэрэглэх
• Бие засах газар гэрийн гадна байрладаг бол гэрийн шаахайгаа солих зэргийг анхаараарай.

---