"Өргөө" амаржих газарт амаржсан эхээс коронавирусийн халдвар өчигдөр илэрсэн. Уг эхийг хүүхдийнх нь хамт ХӨСҮТ рүү тусгаарлахаар авч явахдаа өмссөн халаад, углааштай нь, аманд нь дэр бариулж гаргасан үйлдэлд нийгэм маш ихээр дургүйцлээ илэрхийлж байна. Үүнтэй холбогдуулж "Үнэн ба Зөв" намын дарга А.Отгонбаатар Сүхбаатарын талбайд эсэргүүцлээ илэрхийллээ. Тэрээр УОК огцортол нөхдийн хамт суулт зарлахаа мэдэгдэв.

"Үнэн ба Зөв" намын дарга А.Отгонбаатар:

-Халдвар илэрсэн гэх эмэгтэйг өмссөн халаадтай нь, аманд нь дэр бариулж гаргахыг хараад эхнэр бид хоёр их бухимдлаа. Дөнгөж төрсөн эмэгтэй хүн гэдэг эмзэг. Монгол эх хүн толгойн боолтоо нэг сар тайлдаггүй шүү дээ. Гамаа алдвал эмэгтэй хүн наанадаж халуурч бүлээрнэ, цаанадаж маш их хор урхаг биед нь үлддэг. Тэгэхэд тэр эхийг үнэхээр харгис байдлаар ХӨСҮТ рүү авч явлаа. 

Улсын онцгой комисс /УОК/ өнгөрсөн хугацаанд ямар ч дүрэм журамгүй ажиллаж байгаа. Я.Содбаатар ямар ч дүрэм журам гаргаагүй. 22-ын товчоонд нас барсан Архангайн 59 настай иргэний хэрэг дээр "хариуцлага алдсан хүмүүсийг хална" гэж мэдэгдэж байсан. Товчоон дээр нас барсан 13 настай хүүхэд дээр бас ингэж байсан. "Өргөө" амаржих газарт гарсан хэрэг дээр уучлал гуйсан байна лээ.

Я.Содбаатар албан тушаалдаа үлдэхийн тулд уучлал гуйж байгаа юм. Уучлал гуйгаад болдог байсан бол Архангайн тэр хүн босоод ирэх байсан. 100 жилийн түүхтэй МАН-д ЖДҮ-чин Я.Содбаатараас өөр Шадар сайд хийчих хүн байхгүй байна гэж үү?! Дарга нарын хүүхэд байсан бол ямар өөр байдлаар эмнэлэг рүү авч явах байсан бол. 

Журмын нөхөд маань намайг дэмжихээр ирж байна. Бид нар УОК огцортол талбай дээр суулт хийнэ гэв. 

---