Тунисын иргэд эдийн засгийн хямралыг эсэргүүцэн жагсаж байна

Тунис улсад эсэргүүцлийн жагсаал цуглаан дөрөв дэх хоногтоо үргэлжиллээ. Цагдаа нар гудамжинд гарч жагссан 600 гаруй иргэнийг баривчлан саатуулаад байна.

Тунисын нийслэл Тунис хотын төвд болсон жагсаал бослогод оролцогчдын ихэнх нь залуучууд байгаа юм. Жагсагчид болон цагдаа нарын мөргөлдөөний үеэр чулуу, галт бөмбөг шидэлцжээ. Аюулгүйн хүчний цагдаа нар босогчдын эсрэг нулимс асгаруулагч, даралтат усаар шүршсэн байна.

Умард Африкийн Тунис улсад эдийн засгийн хямрал нүүрлээд байгаа юм. Залуусын 1/3 нь ажилгүй болжээ. Дэлхийн нийтийг хамарсан цар тахлын үед эдийн засгийн хямрал улам хүндрээд байна. Эрх баригчид цар тахалтай тэмцэхийн тулд хорио цээрийн дэглэм хэрэгжүүлж, аравдугаар сараас хойш шөнийн цагаар хөл хорио тогтоосон.

Ойрын өдрүүдэд үргэлжилж байгаа жагсаал бослого нь Арабын хавар-Тунисын хувьсгалаас 10 орчим жилийн дараа гарч байна. Тунисын хувьсгалаас хойш ардчилсан дэглэм тогтоосноор ажлын байр бий болж, залууст боломж нээгдэнэ гэж хүлээж байсан ч сэтгэл дундуур үлджээ.

Нийслэл Тунис хотоос гадна даваа гарагт Кассерин, Гафса, Суссе, Монастир хотуудад жагсагчид, цагдаа нарын мөргөлдөөн гарсан байна. Баривчлан саатуулагдсан хүмүүсийн ихэнх нь баасан гарагаас хойш үргэлжилсэн жагсаалын үеэр хулгай дээрэм, гэмт хэрэг үйлдсэн этгээдүүд гэдгийг Дотоод хэргийн яамнаас мэдээлжээ.

Эх сурвалж: ВВС