Испани улсад -25 хэм хүрч хүйтэрснээс 7 хүн нас баржээ

Испани улсад өнгөрсөн амралтын өдрүүдэд их хэмжээний цас орсны дараа цаг агаар эрс хүйтэрч, одоогийн байдлаар долоон хүн нас бараад байна. Амь насаа алдсан долоон хүний хоёр нь Барселонагийн орон гэргүй иргэд байгаа юм.

Тус улсын зарим хэсэгт цельсийн -25 хэм хүрч хүйтэрсэн нь 20 гаруй жилийн хугацаанд тохиогоогүй хүйтэн цаг уур болохыг мэдээлжээ. Эрх баригчид ахмад настай иргэдийг гэрээсээ гарахгүй байхыг анхааруулж байна.

Нийслэл Мадрид хотын зүүн хэсгийн уулархаг бүс нутаг болох Молина де Арагон, Теруэлийн бүс нутагт агаарын температур цельсийн -25 хэмийн хүйтэнд хүрчээ. Филомена цасан шуурганы дараа үлдсэн зузаан цас мөс болон хувирснаар нийтийн тээврийн хэрэгслийн хөдөлгөөнд саад учруулсан байна.

Өвлийн улиралд ихэнхдээ дулаан байдаг Испани улсын нутаг дэвсгэр их хэмжээний цас мөсөөр хучигджээ. Мадридын шөнө цельсийн -16 хэмийн хүйтэн өнгөрч, коронавируст цар тахлын улмаас олон тооны өвчтөнд дарагдаад байгаа эмнэлгүүдэд мөсөн дээр хальтарч гэмтсэн, ясаа хугалсан өвчтөнүүд ачааллыг нь улам нэмэгдүүлж байна. Даваа гарагт л гэхэд Мадридын эмнэлгүүдэд цас мөсөн дээр унаж бэртэж гэмтсэн 1,200 иргэн ханджээ. Энэ нь цагт ойролцоогоор 50 хүн бэртсэн гэсэн үг юм.

Бэртэл гэмтлээс гадна олон мянган айл гэрэл цахилгааны эх үүсвэрээсээ салжээ. Нийтийн тээврийн хэрэгслийн хөдөлгөөнийг хэвийн үргэлжлүүлэхийн тулд 12,000 гаруй км замыг цэвэрлэх шаардлагатай ба 1,300 орчим цас цэвэрлэгч машин 24 цагийн турш ажиллаж байна.

Эх сурвалж: ВВС